واشنگٹن ٗ نیویارک(این این آئی) امریکہ نے اعتراف کیا ہے کہ 29 اگست کو کابل میں امریکی ڈرون حملے میں 10 معصوم شہری مارے گئے تھے۔ امریکی سینٹرل کمانڈ کمانڈر جنرل کینتھ مکینزی نے کہا ہے کہ ڈرون حملے

میں امدادی کارکن اور اسکے خاندان کے 9 افراد مارے گئے تھے۔امریکی سینٹرل کمانڈ کی تفتیش کے بعد صحافیوں کو بریفنگ میں جنرل کینتھ مکینزی نے کہا کہ امریکی ڈرون حملہ ایک غلطی تھی، جس پر معذرت خواہ ہوں۔امریکی وزیر دفاع Lloyd Austin نے بھی معافی مانگتے ہوئے کہا ہے کہ مارے جانے والے 10 افراد کا داعش خراسان سے تعلق نہیں تھا۔ اس سنگین غلطی سے سبق سیکھنے کی کوشش کریں گے۔دوسری جانب اقوامِ متحدہ کی سلامتی کونسل کے افغانستان میں مشن کو 6 ماہ کی توسیع دے دی گئی۔میڈیا رپورٹ کے مطابق اقوامِ متحدہ کی سلامتی کونسل کے مشن کی توسیع کیلئے پیش کی گئی قرار داد سلامتی کونسل میں متفقہ منظور کر لی گئی۔اس موقع پر اقوامِ متحدہ کی سلامتی کونسل کے اراکین نے افغانستان کیلئے ایک ارب ڈالر کی امداد دینے کے عزم کا اظہار بھی کیا۔سلامتی کونسل کی جانب سے افغانستان میں امن اور استحکام کیلئے کردار جاری رکھنے پر اتفاق بھی کیا گیا۔