اسلام آباد(آن لائن )پاکستان نے 40 سال سے کم عمر افراد کو ایسٹرازینیکا ویکسین لگانے پر عائد پابندی کو ختم کردیا ہے تاکہ سعودی عرب سمیت بیرون جانے کے خواہشمند افراد کی ویکسینیشن میں مدد کی جا سکے۔وزیر اعظم کے مشیر برائے صحت ڈاکٹر فیصل فیصل نے کہا ہے کہ

سعودی حکام نے چینی ویکسین کو منظوری نہیں دی ہے لہٰذا چینی ویکسین لگانے والوں کو قرنطینہ کرنے کی ضرورت ہے اور بہت سے لوگ اس کے متحمل نہیں ہو سکتے۔نجی ٹی وی سے گفتگو کرتے ہوئے فیصل سلطان نے کہا کہ آج سے ہم نے آسٹرا زینیکا کے 40سال سے کم عمر افراد پر استعمال کے حوالے سے عائد پابندی ختم کردی ہے۔ سعودی عرب نے بیرون ملک سے آنے والے افراد کے لیے چار ویکسین کی منظوری دی ہے جن میں آسٹرا زینیکا، فائزر ، موڈرنا اور جانسن اور جانسن شامل ہیں۔پاکستان کو کوویکس کوٹے کے تحت آسٹرا زینیکا کی 12 لاکھ خوراکیں موصول ہو چکی ہیں۔معاون خصوصی نے کہا کہ حکومت سفارتی ذرائع استعمال کررہی ہے تاکہ یہ دیکھا جاسکے کہ آیا سعودی عرب مستقبل میں چینی ویکسینوں کی منظوری دے گا یا نہیں۔سرکاری اعداد و شمار کے مطابق 11 جون تک پاکستان کی 22 کروڑ آبادی میں سے 1.3فیصد کو مکمل طور پر ویکسین لگائی جا چکی ہے جبکہ 3.8 فیصد لوگوں کو کم از کم ایک خوراک لگائی گئی ہے، ان میں سے زیادہ تر افراد کو سائنوفارم یا سائنوویک لگائی گئی ہیں۔