اسلام آباد(مانیٹرنگ ڈیسک، این این آئی)این سی او سی نے جزوی ویکسی نیشن سرٹیفکیٹ کے اجرا کی منظوری دیدی جس کے بعد بیرون ملک سفر کرنے والے جزوی ویکسی نیشن سرٹیفکیٹ حاصل کرپائیں گے۔این سی او سی کے مطابق جزوی ویکسی نیشن سرٹیفکیٹ ایک ڈوز
لگوا کر بیرون ملک جانے والوں کو ملے گا اور سرٹیفکیٹ کا اجرا نادرا کے آن لائن سسٹم سے ہوگا جب کہ وزارت قومی صحت حسب ضرورت سرٹیفکیٹ میں تبدیلی کی مجاز ہوگی۔دوسری جانب وفاقی وزیر اسد عمر نے کہاہے کہ وفاقی حکومت کی جانب سے بھاری سرمایہ کاری سے ملک میں ویکسینیشن مہم میں تیزی لائی جا رہی ہے ۔ اپنے بیان میں انہوںنے کہاکہ ابھی تک ویکسین کی خریداری تقریبا ایک ارب ڈالر کے چوتھائی تک پہنچ چکی ہے، ویکسینز کے حصول کے لئے اگلے سال مزید بہت کچھ خرچ کرنا ہے ۔علاوہ ازیںملک بھر میں 18 سال سے زائد عمر کے افراد کی کورونا ویکسی نیشن شروع کر دی گئی ۔ تفصیلات کے مطابق این سی اوسی نے جمعرات سے 18 سال سے زائد عمر کے افراد کی ویکسی نیشن کا فیصلہ کیا ہے ،این سی اوسی نے ویکسی نیشن کیلئے شہریوں کو رجسٹریشن کی ہدایت کی تھی،ملک بھر میں اب تک 79 لاکھ 53 ہزار سے زائد افراد کی ویکسی نیشن مکمل کی جاچکی ہے
