ہالی وڈ(نیوز ڈیسک)کیپٹن امریکہ ایک بار پھر آئرن مین کے ساتھ ملکر بڑی اسکرین پر تہلکہ مچانے کے لیے تیار ہے۔ کرس ایوانز، رابرٹ ڈاونی جونیئر اور اسکارلٹ جانسن کی نئی سپر ہیرو ایکشن فلم ’کیپٹن امریکا: سول وار‘ کا پہلا ٹریلر جاری کردیا گیا ہے۔ کیپٹن امریکہ: دی فرسٹ ایونجر اور بعد میں ’کیپٹن امریکہ: دی ونٹر سولجر‘ کے اس پریکوئل کی ہدایتکاری انتھونی اور جو روسو نے دی ہے۔ کرسٹوفر مارکس اور اسٹیفن میک فیلی کے تحریر کردہ اسکرین پلے کو کیون فیج نے پروڈیوس کیا ہے۔ فلم کی کہانی اسٹیو راجرز عرف کیپٹن امریکہ (کرس ایوانز)، ٹونی اسٹارک عرف آئرن مین (رابرٹ ڈاونی جونیئر) اور نتاشا رومانوف عرف بلیک ویڈو (اسکارلٹ جانسن) کے گرد گھومتی ہے جو خطرناک اور طاقتور دشمن کے خلاف یکجا ہو کر اپنا مشن مکمل کر رہے ہیں۔ مارول اسٹوڈیوز کے اشتراک سے بننے والی سائنس فکشن ایکشن فلم ’کیپٹن امریکہ: سول وار‘ والٹ ڈزنی اسٹوڈیوز اور موشن پکچرز کے تحت اگلے سال 29اپریل کو برطانیہ اور 6مئی کو امریکہ میں سینما گھروں کی زینت بنائی جائے گی۔