ممبئی(نیوز ڈیسک )بالی ووڈ سٹار عامر خان لدھیانہ میں نئی فلم”دنگل“ کی شوٹنگ کے دوران زخمی ہو گئے۔پروڈکشن ٹیم کے ذرائع نے انڈین ایکسپریس کو بتایا کہ عامر کو کمر اور ٹانگوں کے پٹھوں میں شدید درد ہے اور ڈاکٹروں نے انہیں دو دن مکمل آرام کا مشورہ دیا ہے۔ذرائع نے بتایا کہ درد کی وجہ سخت ورزش اور پہلوانی ہے۔ خیال رہے کہ عامر فلم کی شوٹنگ کے دوران مسلسل پہلوانی اور ورزش کا معمول جاری رکھے ہوئے ہیں۔فلم’ دنگل‘ ہریانہ کے ایک پہلوان مہاویر سنگھ پھوگٹ سے متاثرہو کر بنائی جا رہی ہے۔لدھیانہ میں موجود عامر کے ذاتی ٹرینر راہول بھٹ ان کے کھانے پینے اور ورزش شیڈول کی نگرانی کرتے ہیں۔فلم کے ایگزیکٹیو پروڈیوسر ایلن مک ایلکس نے بتایا کہ شوٹنگ کے دوران عامر کے پٹھوں میں دردہوا لیکن فی الحال وہ ٹھیک ہیں اور جلد ہی آرام کے بعد دوبارہ شوٹنگ میں حصہ لینے لگیں گے۔