اسلام آباد(نیو ز ڈیسک )بولی ووڈانڈسٹری سے تعلق رکھنے والے معروف بچن خاندان کیلئے نومبر کا مہینہ ہر سال خوشیاں لیکر آتا ہے۔یکم نومبر کو اداکارہ ایشوریا رائے اور16نومبر کو انکی صاحبزادی آرادھیاکی سالگرہ کا دن منایا جاتا ہے۔اداکارہ آجکل کرن جوہر کی نئی آنے والی فلم ”اے دل ہے مشکل“ کی شوٹنگ کے سلسلے میں لندن کے دورے پر ہیں۔اداکارہ کی 42ویں سالگرہ کے موقع پر انکے شوہر ادکار ابھیشک بچن کی طرف سے اپنی بیٹی اور ساس کے ہمراہ اہلیہ کو سر پرائز دیا گیا تھا۔سابق حسینہ عالم نے اپنے حالیہ انٹرویو کے دوران میڈیا سے بات چیت کے دوران بتایا کہ وہ روشنیوں کا تہوار دیوالی اپنے گھر میں منائیں گی۔ انکا کہنا تھا کہ ہم سب گھر والوں کو اپنے اپنے مصروف شیڈول میں وقت نکالنے اور ایک دوسرے کے ساتھ صرف کرنے کا بہت کم موقع ملتا ہے۔ لہٰذا وہ اس موقع کو گنوانا نہیں چاہتیں اور اپنا سارا وقت اپنے گھر اور گھر والوں کے ساتھ گزاریں گی۔کرن جوہر کی فلم ”اے دل ہے مشکل“میں ایشوریا رائے بچن کے ساتھ انوشکا شرما، رنبیر کپور اور فواد خان اہم کردار ادا کر رہے ہیں۔