لندن (نیوز ڈیسک) ہالی ووڈ کے حوالے سے اس وقت دو خبروں کا خوب چرچا ہے۔ ان میں سے ایک ہالی ووڈ اداکار براڈ پٹ کا اپنی اہلیہ انجلینا جولی کے ہاتھوں تھپڑ کھانا ہے تو دوسری خبر براڈ پٹ کی ہی سابقہ اہلیہ جینیفر اینسٹن کی شادی ہے۔ یہ خبریں سننے والوں کو ایسا معلوم ہورہا ہے کہ انجلینا نے جینیفر کی شادی کی خبروں پر براڈ پٹ کی ممکنہ اداسی کے پیش نظر ان پر حملہ کر ڈالا تاہم ایسا کچھ نہیں ہے بلکہ یہ ان دونوں کی نئی سنسنی سے بھرپور فلم ” بائی دا سی“ کے ٹریلر کا حصہ ہے۔ دلچسپ خبر یہ ہے کہ ایک منٹ کا یہ ٹریلر بھی عین اسی دن ریلیز ہوا جس دن جینیفر کی شادی کی خبروں کی تصدیق ہوئی۔اس فلم کی ہدایات خود انجلینا نے ہی دی ہیں۔ منفرد کردار نگاری اور منظر کشی کے سبب امید کی جارہی ہے کہ اس فلم کے ذریعے انجلینا کا شمار ہالی ووڈ کی منجھی ہوئی خواتین ہدایت کاروں میں کیا جانے لگے گا۔ ستر کی دہائی کے پس منظر میں بنائی گئی اس فلم میں اینجلینا جولی نے وینیسا نامی سابقہ رقاصہ کا کردار نبھایا ہے جبکہ براٹ پٹ رولینڈ نامی مصنف ہیں۔ دونوں ہی اپنے زوال اور پرکشش ماضی کی یادوں میں کھوئے رہتے ہیں اور ایک دوسرے میں دلچسپی کھو چکے ہیں، اپنے آپس کے رشتے کو بچانے کیلئے وہ کن مشکلات سے دوچار ہوتے ہیں، یہی اس فلم کی اصل کہانی ہے۔ فلم کے ایک منظر میں براڈ پٹ انجلینا سے کہتے ہیں کہ کیا تم مجھے مارنا چاہتی ہو، پہلے تو انجلینا کہہ ڈالتی ہیں کہ تم میرے لئے کچھ نہیں ہو تاہم پھر براڈ پٹ کے اسرار پر انہیں ایک تھپڑ رسید کردیتی ہیں۔ انجلینا اس فلم کی مصفنہ، ہدایت کارہ اور مرکزی اداکارہ ہیں، ان کی یہ فلم نومبر میں ریلیز ہوگی۔یہ جوڑی سب سے پہلے مسٹر اینڈ مسز سمتھ میں ایک ساتھ دکھائی دی تھی اور یہیں سے ان کے درمیان محبت کا آغاز ہوا تھا۔