لندن (نیوزڈیسک) پاکستانی نڑاد برطانوی اداکارہ تسمینہ شیخ جو ایک دہائی قبل ٹی وی کی معروف اداکارہ سمجھی جاتی تھیں، اب برطانوی پارلیمنٹ میں بیٹھ کے عام آدمیوں کے مسائل حل کرتی دکھائی دیں گی۔ انہوں نے سکاٹ لینڈ سے دو حلقوں میں انتخابات جیتے ہیں۔ تسمینہ کو اپنے حریفوں پر بھرپور برتری حاصل رہی، جس سے ان کی علاقے میں مقبولیت کا بخوبی اندازہ لگایاجاسکتا ہے۔
تسمینہ کی کامیابی کی وجہ ان کی خواتین کے حقوق کیلئے جدوجہدہے اور اب ان کی کامیابی پر انہیں جو مبارک باد کے پیغامات ارسال کئے جارہے ہیں، ان میں بھی ان کی خواتین کے حقوق کیلئے جدوجہد کو بطور خاص اہمیت دی جارہی ہے۔ تسمینہ سکاٹ لینڈ کے اخبار دی نیشنل میں کالم نگاری بھی کرتی ہیں۔ تسمینہ نے پی ٹی وی کے معروف ڈراموں دیس پردیس اور آنسو میں اداکاری سے پاکستانی قوم کے دل میں گھر کیا تھا۔