ممبئی (نیوز ڈیسک) بالی ووڈ اداکارہ اور حال ہی میں قلم سے وابستگی اختیار کرنے والے ٹوئنکل کھنہ اور معروف ناول نگار چیتن بھگت کے بیچ ٹوئٹر پر لفظوں کی کھٹی میٹھی جنگ دیکھنے کو ملی ہے۔ چیتن اور ٹوئنکل کے بیچ اس طنزیہ گفتگو کی اصل وجہ چیتن کو ڈانس ریئلٹی شو ”نچ بلیئے“ کے جج کے کردار کا ملنا بنی۔ اکثریت کا ماننا ہے کہ چیتن کو ایک ڈانس شو کا جج بنانے کا کوئی مقصد دکھائی نہیں دیتا ہے۔ٹوئنکل کھنہ بھی غالباً یہی خیال رکھتی ہیں اور اس کا اظہار انہوں نے اپنے ٹوئٹر ہینڈل پر آنے والے ایک ٹوئٹ کے جواب میں کیا۔ ٹوئنکل کے مداح نے انہیں مشورہ دیا تھا کہ وہ ایک شاندار لکھاری ہیں اور انہیں چیتن بھگت کا نسوانی روپ دھارنے کی ضرورت نہیں جس پر ٹوئنکل نے چیتن کے جج کرنے کی صلاحیت پر نامناسب الفاظ استعمال کئے۔ ٹوئٹر پر شروع ہونے والی لفظوں کی جنگ میں صاف دکھائی دیا کہ چیتن، لفظوں کا جادوگر ہونے کے باوجود بھی ٹوئنکل سے ہار گئے۔ آخر میں چیتن نے اس طنز سے بھرپور گفتگو کو ایک تفریح قرار دیتے ہوئے اپنی جان چھڑا لی۔