کیلی فورنیا (ویب ڈیسک) ہالی ووڈ کلاسکس کا درجہ رکھنے والی معروف فلم “گون وِددا ونڈ” میں استعمال کیا جانے والا ایک جوڑا 1 لاکھ37 ہزار ڈالرز میں فروخت ہوا ہے۔ یہ جوڑا فلم میں اداکارہ ویوین لی نے زیب تن کیا۔ انھوں نے سنہ 1939 کی اس معروف فلم میں سکارلٹ او ہارا کا کردار ادا کیا تھا۔ اس لباس کی نیلامی کیلیفورنیا میں ہوئی۔ اس نیلامی کا اہتمام کرنے والے ادارے کے مطابق یہ نوادرات جمع کرنے کے شوقین ایک فرد جیمز ٹمبلین کی ملکیت تھا۔ اس جوڑے کے علاوہ جیمز کی فلم سے متعلقہ دیگر150اشیا بھی اس موقع پر نیلام کی گئیں۔
دلچسپ امر یہ ہے کہ جس وقت یہ جوڑا جیمز کے ہاتھ لگا، اس وقت اس کی قیمت صرف 20 ڈالر تھی۔ انہیں یہ پرانے سامان کی دوکان پر اتفاق سے دکھائی دیا۔ وہ چونکہ یونیورسل سٹوڈیوز کے ملازم تھے، اس لئے اس جوڑے کو پہچان گئے۔ اس جوڑے کو بیچنے والا غالبا اس کی اہمیت سے واقع نہ تھا تاہم گون ود دا ونڈ کو ہالی ووڈ کلاسکس میں شمار کئے جانے کے سبب اس جوڑے کی حیثیت بھی بڑھ گئی۔ سکارٹ اوہارا کے اس کردار پر ویوین لی کو بہترین اداکارہ کا آسکر ایوارڈ بھی دیا گیا تھا۔ یہ جوڑا فلم کے چار مختلف مناظر میں سکارٹ اوہارا کو زیب تن کئے دیکھا جاسکتا ہے۔