کیلی فورنیا (مانیٹرنگ ڈیسک) پیغام رسانی کی سب سے بڑی موبائل اپیلیکشن نے تمام صارفین کے لیے نیا فیچر متعارف کردیا جس کے تحت اب وہ بغیر ٹائپنگ کے میسج لکھ کر بھیج سکتے ہیں۔ تفصیلات کے مطابق موبائل فون کی معروف مسیجنگ ایپلیکشن واٹس ایپ کے دنیا بھر میں کروڑوں صارفین موجود ہیں، گزشتہ برس اکتوبر کے آخر تک جمع ہونے والے اعداد و شمار کے مطابق
پیغام رسانی کی ایپ استعمال کرنے والے صارفین کی تعداد ایک ارب سے تجاوز کرچکی جبکہ روزانہ سیکڑوں کی تعداد میں نئے صارفین اس پلیٹ فارم سے جڑتے ہیں۔ حالیہ سروے کے مطابق واٹس ایپ نے سوشل میڈیا پر سب سے زیادہ استعمال ہونے والی اپلیکشن کا اعزاز بھی اپنے نام کرلیا جبکہ فیس بک کے صارفین میں گزشتہ ایک برس کے دوران کمی ہوئی۔ واٹس ایپ کی سروس 180 ممالک میں استعمال کی جارہی ہے، اسی باعث کمپنی آئے روز صارفین کو متاثر کرنے کے لیے نت نئے فیچرز متعارف کراتی ہے۔ تازہ اطلاعات کے مطابق تمام صارفین کےلیے ایسا فیچر متعارف کرایا جو اس سے پہلے استعمال نہیں ہورہا تھا۔ کمپنی کے ماہرین نے کی بورڈ کے ساتھ مائیک کو جوڑ دیا جس میں اگر کوئی لفظ بولا جائے گا تو سسٹم خود بہ خود تحریر کردے گا۔ طریقہ استعمال اگر صارف کے پاس وقت نہیں اور وہ کسی کو جوابی پیغام بھی بھیجنا چاہ رہا ہے تو آسانی سے ارسال کرسکتا ہے، اس کے لیے کرنا یہ ہوگا کہ وہ ایپ کھولے کی بورڈ پر نظر آنے والے مائیک پر کلک کرے اور اپنی جو جواب دینا ہے وہ بولے، سسٹم اسے خود ہی الفاظ میں تحریر کردے گا۔
