اسلام آباد (این این آئی) حکومت نے نئے بجٹ میں سمندر پار پاکستانیوں کو ڈالر ملک بھجوانے پر پرکشش مراعات دینے کا فیصلہ کرلیا، متعلقہ محکموں نے ڈیوٹی فری یا کم ٹیکس پر گاڑی درآمد کرنے کی اجازت اور ہاؤسنگ سکیموں میں کوٹہ رکھنے سمیت متعدد تجاویز وزارت خزانہ کو بھجوا دیں۔
پاکستان کا 2023-24کا بجٹ 9جون کو وزیر خزانہ اسحاق ڈار قومی اسمبلی میں پیش کریں گے۔حکومت نے نئے مالی سال کے بجٹ میں اوورسیز پاکستانیوں کو ڈالرز ملک بھجوانے پر پرکشش مراعات دینے کا فیصلہ کیا ہے۔وفاقی حکومت نے بجٹ میں اوورسیز پاکستانیوں کیلئے 4سے 5تجاویز تیار کرلیں، جس کے مطابق اوورسیز پاکستانیوں کو ایک ڈیوٹی فری گاڑی منگوانے کی اجازت ہوگی، مقررہ حد تک ڈالر بھجوانے پر فری یا کم ٹیکس پر گاڑی درآمد کی اجازت دینے کی بھی تجویز ہے۔
بجٹ میں اوورسیز پاکستانیوں کیلئے ڈالر میں ادائیگی پر سرکاری ہاسنگ اسکیموں میں 20 فیصد کوٹہ رکھنے اور سرکاری سکیموں میں ڈالر سے پلاٹ خریدنے پر مناسب منافع دینے کی تجاویز شامل ہیں جبکہ اوورسیز پاکستانیوں سے انٹربینک کے بجائے اوپن مارکیٹ ریٹ کے قریب ڈالر خریدنے کی بھی سفارش کی گئی ہے۔رپورٹ کے مطابق بجٹ میں اوورسیز پاکستانیوں کیلئے ڈالر ایکسچینج ریٹ میں ٹیکس کی چھوٹ دینے اور ترسیلات زر بھجوانے پر بینکوں میں بھی اوورسیز کو ریلیف فرہم کرنے کی تجویز ہے۔اوورسیز پاکستانیوں کو مراعات دینے سے محکموں نے اپنی تجاویز وزارت خزانہ کو بھجوادیں، حتمی منظوری وفاقی کابینہ دے گی۔
