بیجنگ(آئی این پی )چین کے سفیر سن وی ڈونگ نے کہا ہے کہ سولر پاور پلانٹ سے ایف 9پارک کی بجلی کی ضروریات پوری ہوں گی،منصوبہ پاک چین سدابہار دوستی کا مظہر ہے،پاک چین اقتصادی راہداری پر کا میابی کے ساتھ پیش رفت جاری ہے۔ان خیالات کا اظہار چینی سفیر نے جمعرات کو ایف نائن پارک میں سولر لائٹنگ پروجیکٹ پاکستان کے حوالے کرنے کی تقریب سے خطاب کرتے ہوئے کیا۔چینی سفیر نے کہاکہ سولر پاورپلانٹ سے 0.85میگاواٹ بجلی حاصل ہوگی،پارک میں تعمیر ہونے والا سولرسسٹم دونوں ممالک کے مابین فروغ پانے والی دوستی کی علامت ہوگا جو کہ چینی عوام وار حکومت کی جانب سے پاکستانی بہن بھائیوں کیلئے محبت کا مظہر ہے،انہوں نے کہاکہ یہ سولرپائورپلانٹ بانی پاکستان قائد اعظم محمدعلی جناح کے یوم پیدائش کے موقع پرچین کااپنے دوست پاکستان کےلئے تحفہ ہے ۔
انہوں نے کہاکہ پاک چین اقتصادی راہداری کے تحت تعمیر کیے جانے والے منصوبوں پر موثر طریقے سے پیش رفت جاری ہے اور امید ہے کہ یہ پاکستان کی توانائی کی ضروریات کو پورا کرنے میں معاون ثابت ہوں گے۔چینی سفیر نے مزید کہا کہ امن اور خوشحالی حاصل کرنا دونوں ممالک کی حکومتوں کا مشترکہ عزم ہے،دونوں ممالک کے مابین دوستی کو وسعت دینے اور دارالحکومت کے شہریوں کامعیار زندگی بہتر بنانے کیلئے چینی حکومت نے ایف نائن پارک میں شمسی توانائی کا منصوبہ لگانے کیلئے اتفاق کیا جو کہ چینی نظریہ گرین انوائرنمنٹ ،فیملی ڈویلپمنٹ کے عین مطابق ہے،گرین لائٹنگ ٹیکنالوجی کے استعمال سے کاربن ڈائی آکسائیڈ کے اخراج صفر فیصد ہوگا۔یہ منصوبہ شہر کو مزید رنگین بنائے گا جب شہری اس پارک کا دورہ کریں گے تو چاند کی روشنی میں شمسی توانائی کا یہ منصوبہ چینی محبت اور تعاون کو یاد دلائے گا۔تقریب میں وفاقی وزیرخزانہ اسحا ق ڈار،میئر اسلام آباد شیخ انصر سمیت اہم شخصیات نے شرکت کی۔سولر پاور پلانٹ سے پارک کے انتظامی بلاک،ٹینس کورٹ،کرکٹ گراؤنڈز اور گیٹس کو بھی بجلی فراہم کی جائے گی
