اسلام آباد(نیوزڈیسک)امیر جماعت اسلامی سینیٹر سراج الحق نے کہا ہے کہ جماعت اسلامی 14 جون کو روہنگیا کے مسلمانوں کے قتل عام پر احتجاج کرے گی جبکہ 15 جون کو ان کے ساتھ اظہار یکجہتی کا دن منائے گی‘ مسلمانوں کے قتل عام پر عالم اسلام کی خاموشی ‘ بے حسی لمحہ فکریہ ہے‘ روہنگیا کے مسلمانوں کے قتل عام پر عالمی برادری تما شا دیکھ رہی ہے یہ انسانیت کیلئے شرم کی بات ہے‘ پاکستان کی حکومت امریکہ کی طرف دیکھ رہی ہے۔ وہ منگل کو پارلیمنٹ ہاﺅس کے باہر میڈیا سے بات چیت کرتے ہوئے سراج الحق نے کہا کہ روہنگیا کے مسلمانوں پر ڈھائے جانے والے مظالم نے ہلاکو خان اور چنگیز خان کے دور کو بھی پیچھے چھوڑ دیا ہے۔ لوگوں کو زندہ جلایا جا رہا ہے۔ خواتین کی بے حرمتی کی جا رہی ہے جبکہ او آئی سی ‘ یورپی یونین ا ور انسانی حقوق کی علمبردار تنظیمیں خاموش ہیں۔ انہوں نے کہاکہ روہنگیا کے مسلمانوں پر ہونے والے مظالم اور قتل عام کی ذمہ دار عالم اسلام کی خاموشی ہے۔ ایک سوال کے جواب میں انہوں نے کہاکہ موجودہ بجٹ بیورو کریسی نے بنایا ہے جس سے غریب عوام کو مایوسی ہوئی اور لوگ بجٹ کو عذاب سمجھنے لگ گئے ہیں۔ انہوں نے کہا کہ غریب عوام کے اصل مسائل مہنگائی‘ بے روزگاری ‘ ضروریات زندگی کی اشیاءہے۔ انہوں نے کہا کہ حکومت نے تیز بجٹ دیا ہے لیکن عام آدمی کو کوئی ریلیف نہیں دیا گیا۔