لاہور (نیوزڈیسک) واہگہ بارڈر پر ہنگامہ-بھارت میں ٹرک ڈرائیور کی گرفتار ی کیخلاف گڈز ٹرانسپورٹرز نے واہگہ بارڈر پر احتجاجی مظاہرہ کیا ، جی ٹی روڈ پر ٹرالر کھڑے کرکے سڑک بلاک کردی، مظاہرین نے شدید نعرے بازی اور ڈرائیور کی رہائی تک احتجاج جاری رکھنے کا اعلان کر دیا ۔ دو ماہ قبل ڈیرہ اسماعیل خان کا رہائشی ڈرائیور علی محمد خان جپسم لے کر بھارت گیا جہاں ایک ٹریفک حادثے کے باعث گرفتار کیا گیا تھا ۔ گزشتہ روز ڈرائیور کی بھارت میں گرفتاری اور ضمانت کے باوجود رہائی نہ ہونے پر گڈز ٹرانسپورٹرز نے واہگہ بارڈر پر احتجاجی مظاہرہ کیا اور جی ٹی روڈ پر ٹرالر کھڑے کرکے ٹریفک معطل کر دی ۔مظاہرین نے بتایا کہ دو ماہ قبل ڈیرہ اسماعیل خان کا رہائشی ڈرائیور علی محمد خان جپسم لے کر بھارت گیا جہاں جپسم کو اتارتے ہوئے حادثاتی طور پر بھارتی مزدور ہلاک ہو گیا جس پر وہاں کی پولیس نے پاکستانی ڈرائیور کو گرفتار کر لیا۔ اب تمام قانونی کارروائی مکمل کر دی گئی ہے اور مزدور کے لواحقین کو 10لاکھ روپے زر ضمانت بھی جمع کروا دیئے گئے ہیںاور دونوں خاندانوں کے درمیان راضی نامہ بھی ہو چکا ہے لیکن ڈرائیور کو رہا نہیں کیا جا رہا جو کہ قابل تشویش ہے ۔بھارتی حکام کا کہنا ہے کہ پاکستان ایمبسی کے ذریعے ضمانت دی جائے جس کے بعد ڈرائیور کو رہا کیا جائے گا ۔ اس معاملے پر متعدد بار حکومتی نمائندوںسے بات کرنے کی کوشش کی لیکن وہ سود مند ثابت نہیںہو ئی ، کسی بھی حکومتی نمائندے نے ہماری بات میں دلچسپی نہیں لی ۔حکومت سے مطالبہ ہے کہ علی محمد کی رہائی کے لیے سفارتی سطح پر کوششیں کی جائیں اگر ڈرائیور کو رہا نہ کیا گیا تو احتجاج کا سلسلہ جاری رکھا جائے گا ۔