ریاض(آئی این پی)سعودی وزیر خارجہ عادل الجبیر نے خبردار کیا ہے کہ اگر ایران نے اپنی روش نہیں بدلی تو سعودی عرب بھی ضروری جواب دے گا، سعودی عرب نے یمن کی مدد کیلیے 930 ملین ڈالر کی رقم مہیا کر دی، یمنی بندرگاہوں کی استعداد کار بڑھانے کے لئے بھی 70 ملین ڈالرز وقف کر دئیے گئے۔ غیر ملکی میڈیا کے مطابق سعودی وزیر خارجہ عادل الجبیر نے کہا کہ اگر ایران نے اپنی روش نہیں بدلی تو سعودی عرب بھی ضروری جواب دینے کا مکمل حق رکھتا ہے۔
سعودی عرب کے ولی عہد شہزادہ محمد بن سلمان نے اقوام متحدہ کے سیکریٹری جنرل انتونیو گوٹیرش سے ملاقات کی۔ ملاقات کے بعد شہزادہ سلمان نے کسی قسم کا بیان دینے سے گریز کیا مگر اْن کے ہمراہ موجود وزیر خارجہ عادل الجبیر نے کہا کہ یہ ملاقات انتہائی مفید رہی اور سعودی عرب نے یمن کی مدد کیلیے 930 ملین ڈالر کی رقم مہیا کی ہے۔ الجبیر نے بتایا کہ یمنی بندرگاہوں کو وسعت دینے اور ان کی استعداد بڑھانے کیلیے بھی ہم نے 70 ملین ڈالرز وقف کیے ہیں۔ یمن میں ایرانی مداخلت کے بارے میں سعودی وزیر خارجہ نے کہا کہ گوٹیرش سے ملاقات میں یہ موضوع زیر بحث لایا گیا اور انہوں نے بھی گزشتہ دنوں سعودی عرب پر بلاسٹک میزائل حملوں کی مذمت کی جو کہ ایرانی ساختہ تھے۔انہوں نے متنبہ کیا کہ اگر ایران نے اپنی روش نہیں بدلی تو سعودی عرب بھی ضروری جواب دینے کا مکمل حق رکھتا ہے۔
