اسلام آباد (آئی این پی ) تحریک انصاف کے چیئرمین عمران خان ترک صدررجب طیب اردگان کی طرف سے خصوصی تحفہ ’’ٹائی ‘‘ ملنے کے باوجود ترک صدر کے پارلیمنٹ سے خطاب کے موقع پر پارلیمنٹ کے مشترکہ اجلاس میں شریک نہیں ہونگے ۔ معلوم ہوا ہے کہ ترک صدر طیب اردگان نے ترکی میں ناکام فوجی انقلاب کے بعد اظہار یکجہتی کے لئے وہاں کا دورہ کرنے والے پاکستانی پارلیمنٹ کے وفد کے ارکان سے ملاقات کے موقع پر وفد کے تمام مرد ممبران کو ترکی کی صدارتی ٹائی تحفے میں پیش کی جب کہ خواتین ارکان کو سکارٹ تحفہ میں دیا ۔ تمام ممبران نے شکریہ کے ساتھ ٹائی وصول کی تاہم پی ٹی آئی کے وفد میں ممبر منزہ حسن نے سکارف کی وصولی کے موقع پر ترک صدر سے درخواست کی وہ ایک ٹائی ان کی پارٹی کے سربراہ عمران خان کے لئے بھی تحفہ کریں اور ساتھ ہی عمران خان کی طرف سے فوجی انقلاب کی ناکامی پر مبارک باد کا پیغام بھی پہنچایا ۔ منزہ حسن کی درخواست پر ترک صدر نے عمران خان کے لئے بھی ٹائی کا تحفہ بھجوایا جو منزہ حسن نے بعد ازاں وطن واپسی پر بنی گالہ جا کر عمران خان کو پہنچایا ۔ مشاہد حسین سید کی قیادت میں ترکی جانے والے پارلیمانی وفد میں صاحبزادہ طارق اللہ ، طلحہ محمود، میرکبیر سمیت ستارہ ایاز ، سحر کامران اور منزہ حسن شامل تھیں۔ ۔۔۔(م د +ع ع )