2022ءمیں قطر میں فٹ بال ورلڈ کپ منعقد ہونے جا رہا ہے جس کی تیاریوں میں لگی قطری حکومت کو مزدوروں کی کمی کا سامنا ہے اور وہ اس کمی کو پورا کرنے کے لیے تارکین وطن کے لیے مختلف آسانیاں پیدا کر رہی ہے تاکہ زیادہ سے زیادہ مزدور قطر آ سکیں۔ اسی سلسلے میں قطری حکومت نے آئندہ سال کے آغاز سے مزدوروں کے لیے الیکٹرانک کنٹریکٹ سسٹم متعارف کروانے کا فیصلہ کیا ہے۔
قطر کی وزارت محنت کے سینئر آفیشل محمد علی المیر کا کہنا ہے کہ میں اپنی نوعیت کا یہ منفرد سسٹم آئندہ سال مارچ میں کام شروع کر دے گا۔ انہوں نے کہا کہ اس سسٹم سے مزدوروں کو اپنے حقوق سے آگاہی ملے گی اور وہ کسی بھی مسئلے کی صورت میں ویب سائٹ کے ذریعے براہ راست حکومت سے رابطہ کر سکیں گے۔ اس کے لیے انہیں ویب سائٹ پر اپنا نام، آئی ڈی اور ویزہ نمبر داخل کرنا ہو گا۔ یہ تمام معلومات دینے سے ان کا ورک کنٹریکٹ ان کے سامنے آ جائے گا اور وہ تمام معلوما ت یہاں حاصل کر سکیں گے۔ اس کے علاوہ شکایات بھی درج کروا سکیں گے۔المیر نے بتایا کہ عموماً مزدوروں کے ساتھ کیا جانے والا معاہدہ عربی یا انگریزی زبانوں میں ہوتا ہے اس لیے دیگر ممالک کے مزدور اسے نہیں پڑھ سکتے اور ایسے میں ان کا استحصال ہوتا ہے۔ اس سسٹم کے تحت ویب سائٹ پر عربی اور انگریزی کے علاوہ مزدوروں کی قومی زبانوں میں بھی معلومات فراہم کی جائیں گی جس سے ان کو کنٹریکٹ کو پڑھنے میں آسانی ہو گی۔ ابتدائی طور پر اس ویب سائٹ پر اردو اور نیپالی سمیت 10زبانیں شامل کی گئی ہیں۔