فلم پی کے کی ریلیز کے بعد عامر خان مختلف گروپس کی جانب سے تنقید کے نشانے پر ہیں، اب ان کے دوست دبنگ خان سلمان بھی نئے تنازع میں پھنس گئے ہیں۔
سینکڑوں تامل افراد نے ممبئی میں بولی وڈ اسٹار سلمان خان کی رہائش گاہ کے باہر احتجاجی مظاہرہ کئیے.
انڈین میڈیا کے مطابق مظاہرین کا کہنا تھا کہ وہ اپنا احتجاج اس وقت تک جاری رکھیں گے جب تک دبنگ خان سری لنکن صدر مہندا راجا پاکسے کی حمایت کی مبینہ مہم پر معافی نہیں مانگے گے.
سلمان خان کی جانب سے گزشتہ دنوں سری لنکا کے دورے کے دوران صدارتی انتخابات سے قبل راجاپاکسے کی حمایت میں مہم چلانے کا الزام سامنے آیا تھا، جس پر متعدد ہندوستانی سیاسی جماعتیں جیسے ایم ڈی ایم کے اور ڈی ایم کے نے تنقید کرتے ہوئے کہا تھا کہ راجاپاکسے کی حمایت نا صرف تامل افراد بلکہ ان انڈین ماہی گیروں کے ساتھ بھی ظلم ہے جنھیں سری لنکن بحریہ نے نشانہ بنایا۔
خیال رہے کہ بولی وڈ اسٹار سلمان خان نے گزشتہ ہفتے سری لنکا کا دورہ کیا تھا، یہ پہلی مرتبہ تھا جب کوئی بڑا انڈین فنکار سری لنکا میں صدارتی الیکشن کی مہم میں شامل ہوا۔
سلمان کے علاوہ سری لنکا میں پیدا ہونے والی جیکولین فرننڈس اور پانچ دوسرے بولی وڈ فنکار بھی راجا پاکسے کی حمایت میں اسٹیج پر جلوہ گر ہوئے۔
