میران شاہ۔۔۔۔اتوار کی صبح پاکستان کے قبائلی علاقے شمالی وزیرستان ایجنسی میں امریکی جاسوس طیارے کے حملے میں سات شدت پسند مارے گئے ہیں جبکہ تین زخمی ہوئے ہیں۔یہ حملہ صبح ساڑھے آٹھ بجے اور نو بجے کے درمیان کیا گیا۔مقامی لوگوں نے بتایا کہ جاسوس طیارے ڈرون نے تحصیل دتہ خیل میں الوڑہ منڈی کے قریب ایک مکان کو نشانہ بنایا ہے۔ یہ مکان مکان کالعدم تنظیم تحریک طالبان کے ایک دھڑے کے مرکز کے طور پر استعمال کیا جا رہا تھا۔جاسوس طیارے نے دو میزائل داغے، جبکہ حملے کے بعد بھی یہ بلاہواباز طیارے خاصی دیر تک فضا میں گردش کرتے رہے۔اطلاعات موصول ہوئی ہیں کہ اس حملے میں ایک اہم ازبک کمانڈر بھی ہلاک ہوا ہے، جس کا تعلق حافظ گل بہادر گروپ سے بتایا گیا ہے۔شمالی وزیرستان میں گذشتہ سال وسط جون سے فوجی آپریشن ضرب عضب شروع کیا گیا تھا اور اس آپریشن کے سلسلے میں پاکستان فوج کی کارروائیاں بھی جاری ہیں لیکن ساتھ ساتھ کبھی کبھار امریکی جاسوس طیارے بھی مشتبہ مقامات پر حملے کرتے رہتے ہیں۔پاکستان کا محکمہ خارجہ پاکستانی حدود میں کیے جانے والے ڈرون حملوں کی مذمت کرتا رہا ہے۔