واشنگٹن۔۔۔۔ امریکی ریاست میسی سپی میں بگولوں نے تباہی مچادی جس کے باعث مختلف حادثات میں 4 افراد ہلاک جب کہ 50 سے زائد زخمی ہوگئے۔غیر ملکی میڈیا کے مطابق امریکی حکام کا کہنا ہے کہ بگولوں نے مسی سپی کے جنوبی علاقے میں سب کچھ تہس نہس کردیا، طوفان کے باعث40سے زائد گھروں اور عمارتوں کو نقصان پہنچا، درخت اور بجلی کے تار گرنے سے کئی علاقوں میں بجلی کی فراہمی منقطع ہوگئی اور سڑکوں پر ٹریفک کی روانی متاثر ہوگئی۔ میسی سپی، جارجیا اور لوزیانا میں 5 بگولے ریکارڈ کیے گئے۔ کولمبیا میں طوفان کے باعث مواصلاتی نظام خراب ہونے سے 80فیصد علاقے بجلی کی فراہمی سے محروم ہوگئے ہیں، بارشوں اور طوفان سے بڑی تعداد میں گھر بھی تباہ ہوگئے۔میسی سپی کے گورنر فیل برائنٹ نے سب سے زیادہ متاثر ہونے والی2 کاؤنٹیز میں ہنگامی حالت کے نفاذ کا اعلان کردیا۔ جونز اور میرین نامی کاؤنٹیز میں طوفانی بگولے کی زد میں ا?نے والے علاقوں میں متعدد عمارتیں تباہ اور ہزاروں صارفین کو بجلی کی فراہمی معطل ہوگئی۔ مقامی ذرائع ابلاغ کے مطابق ہلاک ہونے والوں میں سے2 افراد ایک موبائل گھر میں موجود تھے جسے طوفانی بگولے نے تباہ کردیا۔