اسلام آباد (نیوز ڈیسک) پیٹرولیم سیکٹر نے پیٹرول، ڈیزل اور دیگر مصنوعات کی قیمتوں میں کمی سے متعلق ورکنگ مکمل کرلی ہے، جس کے مطابق فی لیٹر قیمتوں میں زیادہ سے زیادہ 3 روپے 13 پیسے کمی کی تجویز دی گئی ہے۔ تاہم، اگر حکومت کی جانب سے ٹیکسز میں اضافہ کیا گیا تو عوام اس ریلیف سے محروم رہ سکتے ہیں۔

ذرائع کے مطابق اوگرا 31 اگست کو سمری وزارت خزانہ کو ارسال کرے گا، جبکہ حتمی فیصلہ وزیراعظم کی منظوری کے بعد ہوگا۔ نئی قیمتوں کا اطلاق یکم ستمبر سے 15 روز کے لیے متوقع ہے۔تجویز کردہ ورکنگ کے مطابق، ہائی اسپیڈ ڈیزل کی فی لیٹر قیمت 272.99 روپے سے گھٹ کر 269.86 روپے اور پیٹرول کی قیمت 264.61 روپے سے کم ہو کر 264 روپے مقرر کیے جانے کا امکان ہے۔ اسی طرح، مٹی کے تیل میں ایک روپے 57 پیسے کمی کے بعد نئی قیمت 176.70 روپے فی لیٹر اور لائٹ ڈیزل کی قیمت 2 روپے 61 پیسے کمی کے بعد 159.55 روپے ہونے کی توقع ہے۔رپورٹ میں بتایا گیا ہے کہ اس ورکنگ میں ایکسچینج ریٹ اور حکومتی ٹیکسز کو شامل نہیں کیا گیا، لہٰذا وفاقی حکومت کے فیصلے کی بنیاد پر قیمتوں میں تبدیلی ممکن ہے۔