ریاض (نیوز ڈیسک) سعودی عرب کی وزارت حج و عمرہ نے بین الاقوامی عمرہ زائرین کے لیے ایک نئی ہدایت جاری کرتے ہوئے کہا ہے کہ نئے عمرہ سیزن سے ویزا صرف انہی افراد کو جاری کیا جائے گا جن کی رہائش “نسک مسار” کے ڈیجیٹل پلیٹ فارم پر باقاعدہ درج ہو گی۔

یہ نئی پالیسی 10 جون 2025، مطابق 14 ذو الحجہ 1446 ہجری سے نافذ العمل ہو گئی ہے۔ اس کے مطابق تمام عمرہ کمپنیوں، سروس فراہم کنندگان اور بین الاقوامی ایجنٹس کو ہدایت کی گئی ہے کہ وہ زائرین کی رہائش کا بندوبست صرف ان ہوٹلوں میں کریں جو سعودی وزارت سیاحت سے لائسنس یافتہ ہوں، اور ان کی معلومات “نسک مسار” سسٹم میں اپ لوڈ کی جائیں۔

وزارت نے خبردار کیا ہے کہ اس نئے طریقہ کار کی خلاف ورزی کی صورت میں متعلقہ اداروں کو ویزوں میں تاخیر یا مالی جرمانوں کا سامنا کرنا پڑ سکتا ہے۔

یہ اقدام سعودی وژن 2030 کے تحت مذہبی سیاحت کے شعبے کو جدید تقاضوں سے ہم آہنگ کرنے کی کوششوں کا حصہ ہے، جس کا مقصد اعلیٰ معیار کی خدمات کو فروغ دینا اور زائرین کو آسانیاں فراہم کرنا ہے۔

“نسک مسار” اب عمرہ زائرین کے لیے ایک مربوط اور جامع ڈیجیٹل پلیٹ فارم کے طور پر سامنے آیا ہے، جہاں سے وہ نہ صرف ویزے اور رہائش کی بکنگ مکمل کر سکتے ہیں بلکہ متعدد زبانوں میں تعلیمی مواد اور رہنمائی بھی حاصل کر سکتے ہیں۔