اسلام آباد (نیوز رپورٹر) وفاقی وزیر خزانہ محمد اورنگزیب کا کہنا ہے کہ ایران اور اسرائیل کے درمیان جاری تنازع کے پیش نظر پاکستان میں پیٹرولیم مصنوعات کی فراہمی اور ذخائر کی صورتحال پر گہری نظر رکھی جا رہی ہے۔
نجی ٹی وی کے مطابق قومی اسمبلی کی قائمہ کمیٹی برائے خزانہ کے اجلاس کی صدارت سید نوید قمر نے کی، جس میں اپوزیشن لیڈر عمر ایوب خان نے ایران اسرائیل کشیدگی پر گفتگو کرتے ہوئے کہا کہ عالمی منڈی میں تیل کی قیمتوں میں اضافہ ہو رہا ہے۔ ان کا کہنا تھا کہ ایران دنیا کا چھٹا بڑا تیل پیدا کرنے والا ملک ہے اور اگر آبنائے ہرمز سے تیل کی ترسیل متاثر ہوئی تو اس کے عالمی معیشت پر منفی اثرات مرتب ہو سکتے ہیں۔
عمر ایوب نے مزید کہا کہ اگر جنگ شدت اختیار کرتی ہے تو پاکستان کی تیل کی درآمدات میں اضافہ ہو سکتا ہے، جس کا براہ راست اثر ملکی بجٹ اور کرنٹ اکاؤنٹ خسارے پر پڑ سکتا ہے۔
اس موقع پر وزیر خزانہ محمد اورنگزیب نے کمیٹی کو آگاہ کیا کہ حکومت موجودہ علاقائی صورتحال کا باریک بینی سے تجزیہ کر رہی ہے۔ ان کے مطابق وزیر اعظم کی ہدایت پر ایک اعلیٰ سطحی کمیٹی تشکیل دی گئی ہے جو عالمی سطح پر تیل کی قیمتوں میں ممکنہ اتار چڑھاؤ اور اس کے اثرات کا جائزہ لے رہی ہے۔ کمیٹی کا پہلا اجلاس ہوچکا ہے، اور اب پیٹرولیم مصنوعات کی سپلائی اور ذخیرہ اندوزی کی صورتحال کا بھی تفصیل سے معائنہ کیا جا رہا ہے۔
