اسلام آباد (این این آئی)اسلام آباد ہائی کورٹ نے سابق وزیراعظم عمران خان کے خلاف نااہلی کی درخواست قابل سماعت ہونے کیلئے دوبارہ دلائل طلب کرلیے، جسٹس عامر فاروق نے تحریری حکم نامہ جاری کردیا۔اسلام آباد ہائی کورٹ میں عمران خان کے

خلاف نااہلی کی درخواست دائر کی گئی تھی جس کے قابل سماعت ہونے کیلئے عدالت نے دوبارہ دلائل طلب کرلیے، عدالت نے درخواست گزار کو حکم دیا کہ آئندہ سماعت پر درخواست قابل سماعت ہونے پر دلائل دیں۔عدالت نے کہا کہ ممبر قومی اسمبلی کی نا اہلی سے متعلق درخواست قابل سماعت ہونے کا بنیادی سوال ہے، سپریم کورٹ کے فیصلوں کی روشنی میں آئندہ سماعت پر درخواست گزار عدالت کی معاونت کریں۔اسلام آباد کے شہری محمد ساجد نے عمران خان کی نااہلی کی درخواست دائر کر رکھی ہے، جس میں مؤقف اختیار کیا گیا کہ عمران خان نے کاغذات نامزدگی میں معلومات چھپائیں اور بیٹی ٹائیریان کو کاغذات نامزدگی میں ظاہر نہیں کیا۔درخواست میں کہا گیا کہ عمران خان پہلے ٹائیریان سے متعلق تردید کرتے تھے اور اب ٹائیریان سے متعلق سوال کا جواب نہیں دیتے حالانکہ وہ جانتے ہیں کہ ان کیخلاف ثبوت موجود ہیں۔عدالت میں دائر درخواست میں شہری محمد ساجد نے کہا کہ عمران خان پبلک آفس یا پارٹی سربراہ کا عہدہ نہیں رکھ سکتے، عمران خان سے پوچھا جائے ان پر آرٹیکل 62 ون ایف کا اطلاق کیوں نہ ہو؟درخواست کا مؤقف سننے اور حکم نامہ جاری کرنے کے بعد عدالت نے کیس کی سماعت ستمبر کے دوسرے ہفتے تک ملتوی کردی۔