اسلام آباد(آئی این پی)وزیر خزانہ مفتاح اسماعیل کا کہنا ہے کہ پٹرولیم مصنوعات کی قیمتوں میں کمی کا اعلان آ ج بدھ کو کیا جائے گا۔نجی ٹی وی سے گفتگو کرتے ہوئے وزیر خزانہ نے کہا کہ پٹرولیم ڈویژن کی طرف سے سمری آج وزارت خزانہ کو بھجوائی جائے گی جسے اسی وقت ہی وزیر اعظم کو بھجوادیا جائے گا۔
انہوں نے کہا کہ وزیر اعظم شہباز شریف کی ہدایت پر پٹرولیم مصنوعات کی قیمتوں میں ردو بدل کا فیصلہ آج بدھ کو ہی کیا جائے گا۔دوسری جانب وزیراعظم شہباز شریف نے بڑی عید پر عوام کو بڑی خوش خبری دینے کا فیصلہ کرلیا ۔ عالمی منڈی میں تیل کی قیمتوں میں کمی کا پورا فائدہ عوام کو منتقل کیا جائے گا۔ نجی ٹی وی کے مطابق وزیراعظم شہباز شریف نے وزارت پٹرولیم اور وزارت خزانہ سے تیل کی قیمتوں میں کمی کی سمری مانگ لی۔ وزیر اعظم کا کہنا ہے کہ عوام نے مشکل وقت گزارا ہے، اب پورا ریلیف ملنا بھی ان کا حق ہے،عالمی منڈی میں جتنی کمی ہوئی ہے، پوری شفافیت کے ساتھ عوام کو اس کی منتقلی یقینی بنائی جائے۔وزیراعظم نے اپنی زیرصدارت منعقدہ اجلاس میں تیل کی قیمتوں میں کمی کی سمری بھجوانے کا حکم دیاہے ۔ اجلاس سے خطاب کرتے ہوئے وزیراعظم نے کہا کہ سابق حکومت کی لائی مہنگائی سے ستائے عوام کی حتی المقدور اشک شوئی کرتے رہیں گے ۔ اللہ تعالی کا فضل وکرم یوں ہی جاری رہا تو اِن شااللہ عوام کی زندگی میں مزید آسانیاں لائیں گے۔
