اسلام آباد (این این آئی)لیفٹیننٹ جنرل ریٹائرڈ محمد ہارون اسلم میجر جنرل ریٹائرڈ اعجاز اعوان نے خود سے منسوب کیے گئے فوج مخالف بیانات کو جعلی قرار دے دیا۔ سابق وزیراعظم عمران خان کے خلاف تحریک عدم اعتماد کی کامیابی کے ساتھ مذکورہ ریٹائرڈ فوجی افسران کے نام
سے سوشل میڈیا پر پاک فوج کے خلاف جعلی آڈیو پیغامات وائرل ہوئے تھے تاہم اب میجر جنرل ریٹائرڈ اعجاز اعوان اور لیفٹیننٹ جنرل ریٹائرڈ محمد ہارون اسلم نے ٹوئٹر پر جاری کیے گئے پیغامات میں ان آڈیو کو جعلی قرار دیا ہے۔جنرل ریٹائرڈ اعجاز اعوان نے ٹوئٹر پر ٹوئٹ کرتے ہوئے کہا کہ ان سے منسوب آڈیو بیان جعلی ہے، فوج میری شناخت اور پہلا پیار ہے، اس قسم کی پوسٹ نہیں کرسکتا۔دوسری جانب اس حوالے سے لیفٹیننٹ جنرل ریٹائرڈ محمد ہارون اسلم نے بھی ایک ویڈیو پیغام جاری کیا جس میں ان کا کہنا تھا کہ ان سے منسوب جعلی آڈیو ریکارڈنگز چلائی جارہی ہیں جس میں کوئی حقیقت نہیں۔انہوں نے کہا کہ میں نے 40 سال فوج میں خدمات انجام دی ہیں، آڈیوز میں چلائی جانے والی آواز میری نہیں ہے اور میں اس قسم کی غیر ذمہ دارانہ گفتگو نہیں کرتا۔دوسری جانب وفاقی تحقیقاتی ادارے (ایف آئی اے) کے انسداد دہشتگردی ونگ نے سوشل میڈیا پر سکیورٹی اداروں کے خلاف مہم چلانے پر مزید 7 افراد کو گرفتار کرلیا۔
ایف آئی اے ذرائع کے مطابق ملک بھر سے مزید 7 ملزمان کو گرفتار کیا گیا ہے جس کے بعد ملزمان کی تعداد 12 ہوگئی ہے، 9 ملزمان کے خلاف مقدمات بھی درج کیے گئے ہیں۔ایف آئی اے ذرائع کے مطابق اس حوالے سے روزانہ آن لائن میٹنگز میں صورتحال کا جائزہ لیا گیا۔ایف آئی اے ذرائع کا بتانا کہ ادارے کی کارروائیوں کے نتیجے میں ٹرینڈ چوتھے نمبر سے بھی نیچے آگیا۔
