لاہور (آن لائن )پاکستان مسلم لیگ ن نے وزیراعظم عمران خان پر ہندوستان کو سب سے زیادہ فائدہ پہنچانے کا الزام عائد کر تے ہوئے کہا ہے کہ عمران خان اپنی ذمہ داری سے بھاگنے کے لیے اداروں کو الزام دیتے ہیں ، فواد چوہدری فوج کو سیاست میں گھسیٹ رہے ہیں اور الزام اپوزیشن پر لگا رہے ہیں، اپوزیشن کا پھر چیلنج ہے
کل قومی اسمبلی کا اجلاس بلائیں اگر آپ کو خود پر اعتماد ہے تو کیوں ارکان کو پارلیمنٹ آنے سے روک رہے ہیں۔ لیگی رہنما خرم دستگیرکا کہنا ہے عمران خان کی خارجہ پالیسی کا واحد نتیجہ پاکستان کے مفادات کو نقصان پہنچانا ہے،مریم اورنگزیب نے کہا اپنے ارکان اور ان کو چھوڑ کر ووٹ دینے والے ارکان کی حفاظت کریں گے۔ مسلم لیگ ن کے مرکزی سیکریٹریٹ میں لیگی رہنما ئوں خرم دستگیر اور ترجمان مریم اورنگزیب نے مشترکہ پریس کانفرنس سے خطاب کرتے ہوئے وزیراعظم عمران خان پرکڑی تنقید کی ۔ خرم دستگیر کا کہنا تھا کہ عمران خان اپنی ذمہ داری سے بھاگنے کے لیے اداروں کو الزام دیتے ہیں ان کی خارجہ پالیسی کا واحد نتیجہ پاکستان کے مفادات کو نقصان پہنچانا ہے عمران خان نے دورہ روس کے لیے انتہائی غلط وقت کا انتخاب کیا۔ مسلم لیگ ن کی ترجمان مریم اورنگزیب نے وزیراعظم عمران خان پر تنقید کرتے ہوئے کہا کہ ملک کا وزیراعظم جب اپوزیشن کو کہے تم میری بندوق کے نشانے پر ہے تو ہر شہری کو خطرہ ہے جو بات وزیراعظم کہتا ہے وہی بات کرائے کے ترجمان کرتے ہیں لیگی رہنمائوں کا کہنا تھاکہ فواد چوہدری فوج کو سیاست میں گھسیٹ رہے ہیں اور الزام اپوزیشن پر لگا رہے ہیں اپوزیشن کا پھر چیلنج ہے کہ کل قومی اسمبلی کا اجلاس بلائیں اگر آپ کو خود پر اعتماد ہے تو کیوں ارکان کو پارلیمنٹ آنے سے روک رہے ہیں ۔
