لاہور (نیوز ڈیسک) بھارتی انتہا پسند جماعت ایم این ایس کے سربراہ راج ٹھاکرے نے کہا ہے کہ سلمان خان کے پاس عقل نہیں ہے، اس کا سر دماغ سے خالی ہے۔ وہ یعقوب میمن کی پھانسی کے معاملے پر سلمان خان کے متنازعہ ٹوئٹس کے حوالے سے اپنے خیالات کا اظہار کررہے تھے۔ انہوں نے کہا کہ سلمان خان کے والد عزت دار شخص ہیں۔ سلمان خان اخبار نہیں پڑھتا ہے اور اسے قانون کا کچھ نہیں پتہ ہے اسی لئے وہ اس کی حمایت میں ٹوئٹ کئے جارہا تھا۔راج ٹھاکرے ، سلمان خان کیخلاف گزشتہ دنوں ہٹ اینڈ رن کیس میں آنے والے فیصلے کے بعد ان کے گھر بھی گئے تھے۔ اس معاملے پر ان کا کہنا تھا کہ سلمان خان کے والد سلیم خان کے ساتھ ان کے گہرے تعلقات ہیں، اس لئے وہ پریشانی کے وقت میں ان کا ساتھ دینے کیلئے گئے تھے۔ راج ٹھاکرے نے اس موقع پر صوبائی و وفاقی حکومت کو بھی سخت تنقید کا نشانہ بنایا کہ میڈیا کے یعقوب میمن کو ہیرو بنا ڈالنے میں اصل قصور حکومتی نااہلی کا ہے۔ راج ٹھاکرے ہندو انتہا پسندی کی علامت سمجھے جانے والے لیڈر بال ٹھاکرے کے بھتیجے ہیں۔