دبئی (آن لائن ) قومی ٹیم کے سابق کپتان محمد حفیظ کا کہنا ہے کہ ٹورنامنٹ سے قبل پاکستان سے متعلق رائے کو پوری ٹیم نے مل کر تبدیل کیا۔ پی سی بی کے ٹوئٹر اکاؤنٹ پر محمد حفیظ کا ویڈیو بیان جاری کیا گیا ہے جس میں انہوں نے کہا کہ پاکستان کرکٹ ٹیم کا حصہ ہوکر
خود پر فخر محسوس کرتا ہوں۔ حفیظ کا کہنا تھا کہ ٹی ٹونٹی ورلڈکپ میں آنے سے قبل لاہور میں ہی ٹیم نے اپنا مائنڈ سیٹ تبدیل کرتے ہوئے خود کو ذہنی اور جسمانی طور پر تیار کرلیا تھا۔سینئر کرکٹر کا کہنا تھا کہ بھارت کیخلاف پہلا میچ ان کے کیریئر کی خوبصورت ترین جیت ہے، اس کے بعد کھلاڑیوں نے مثبت کھیل پیش کیا، کپتان بابر اعظم سے لے کر ٹیم کے ہر بیٹر اور بولر نے مشکل حالات میں چیلنجز کا مقابلہ کیا۔انہوں نے مزید کہا کہ بابراعظم اور محمد رضوان نے بھارت کے خلاف شاندار اننگز کھیلی، بھارت کے خلاف جیت پر بہت مزہ آیا،بھارت کے خلاف جیتنے کے بعد قومی ٹیم کا اعتماد بڑھا اور جب کھلاڑی نیوزی لینڈ کے خلاف میدان میں اترے تو محسوس ہوا کہ ان میں جیت کا جذبہ زیادہ ہے۔محمد حفیظ نے کھلاڑیوں سمیت کوچ اور چیف سلیکٹر کی تعریف کرتے ہوئے کہا کہ ٹیم میں ہر کھلاڑی ایک دوسرے کو سپورٹ کرتے ہیں، امید ہے کہ ہم جس مومنٹم اور لگن کے ساتھ کھیلتے ہوئے اس ملک کے لیے عزت کمانا چاہتے ہیں تو اللہ بھی ہماری مدد کرے گا۔ ان کا کہنا تھا کہ ہمیں کسی تبدیلی کی ضرورت نہیں، ہم سب کی کارکردگی بہترین جارہی ہے، انشاء اللہ اس ٹورنامنٹ میں ہم فاتح ہوں گے۔
