کراچی(این این آئی)سندھ حکومت نے پیٹرولیم مصنوعات کی قیمتوں میں اضافے کو مسترد کر دیا۔وزیرِ ٹرانسپورٹ سندھ اویس شاہ نے کہا ہے کہ پیٹرول کی قیمت میں پہلے 5 اور اب 4 روپے کا اضافہ معاشی دہشت گردی ہے۔انہوں نے کہا کہ ڈیزل میں مزید 2 روپے کا اضافہ مہنگائی کو

دعوت دینے کے مترادف ہے۔انہوں نے کہا کہ اب عوام کو اپنے حق کیلئے باہر نکلنا ہوگا نہیں تو یہ سلیکٹڈ غریبوں سے جینے کا حق چھین لیں گے۔اویس شاہ نے کہاکہ روپیہ ڈالر کے آگے تاریخی سطح پر گراوٹ کا شکار ہے۔صوبائی وزیر اسماعیل راہو نے پیٹرول کی قیمتوں کو مسترد کرتے ہوئے کہا کہ پی ٹی آئی جیسی نااہل اور نالائق حکومت آج تک نہیں دیکھی۔ترجمان سندھ حکومت بیرسٹر مرتضی وہاب نے بھی پیٹرولیم مصنوعات کی قیمتوں میں ظالمانہ اضافے کو مسترد کرتے ہوئے کہاکہ عوام نااہل حکومت کی اس ناانصافی کو قبول نہیں کرینگے۔سلیکٹڈ سرکار نے اپنی نااہلی سے عوام کا جینا محال کردیا ہے۔نیازی صاحب آپکو عوام کا زرہ برابر بھی خیال ہے تو یہ اضافہ فوری واپس لیں۔ترجمان سندھ حکومت نے کہاکہ بدترین مہنگائی نے غریب کو خودکشی پر مجبور کردیا ہے۔عوام حقیقت میں دو وقت کی روٹی کو ترس رہے ہیں۔ترجمان سندھ حکومت نے کہاکہ تیل کی قیمتوں میں اضافے سے مہنگائی کی شرح میں مزید اضافہ ہوگا۔سلیکٹڈ حکومت نے عوام کی چیخیں نکلوا کر انہیں گھبرانے پر بھی مجبور کردیا ہے۔مہنگائی کا سیلاب نااہل نیازی سرکار کو بہا لے جائیگا۔