ایریزوناسٹی(این این آئی )انٹرنیٹ پر اپنے ناراض تیور کی وجہ سے معروف گرمپی کیٹ( ناراض بلی) کی مالکن نے بتایا ہے کہ صرف سات سال کی عمر میں ان کی پالتو بلی چل بسی۔میڈیارپورٹس کے مطابق ناراض بلی کی مالکن ٹیبیتھا بنڈسن نے بتایاکہ چہرے پر غصے والے
تاثرات کی وجہ اس کے پست قد کی نسل اور دانتوں کی مخصوص بناوٹ تھی۔گرمپی کیٹ کے ٹوئٹر اکاؤنٹ میں بتایاگیا کہ اِس کی موت پیشاب کی نالی کے انفیکشن اور اس میں پیش آنے والی پیچیدگیوں کی وجہ سے ہوئی۔امریکی ریاست ایریزونا سے تعلق رکھنے والی ناراض بلی نے دنیا بھر میں لاکھوں لوگوں کو ہنسایا۔ناراض بلی کا اصل نام ٹارڈار ساس تھا۔ سنہ 2012 میں اس بلی کی چند تصاویر نے انٹرنیٹ پر مقبولیت حاصل کی تھی جس کے بعد دنیا بھر میں اس کی تصاویر میمز پھیل گئیں۔گرمپی کیٹ نے نہ صرف پوری دنیا گھومی بلکہ مختلف ٹی وی شوز میں بھی شرکت کی۔سنہ 2014 میں ناراض بلی نے اپنی ذات پر بنائی گئی فلم میں بھی کام کیا جو کرسمس کے موقع پر ریلیز ہوئی اور اِس نے خوب شہرت حاصل کی۔امریکی شہر سان فرانسسکو میں موجود مومی مجسموں کے لیے مشہور عجائب گھر مادام تساد نے 2015 میں ناراض بلی کا موم کا پتلا متعارف کرایا تھا۔اس بلی کی شہرت کا اندازہ اس بات سے لگایا جا سکتا ہے کہ انسٹاگرام پر اِسے 20 لاکھ افراد فالو کرتے ہیں۔
