لاہور(نیوزڈیسک)مائنس مسلم لیگ (ن) لیگی دھڑوں کے انضمام کےلئے رابطوں میں مزید تیزی آ گئی ، مرکزی رہنماﺅں کا غیر رسمی اجلاس کل (ہفتہ ) کو بزرگ لیگی رہنما سردار ذوالفقار علی خان کھوسہ کی رہائشگاہ پر منعقد ہوگا جس میں چوہدری پرویزالٰہی کی بھی شرکت کا امکان ہے جبکہ شیخ رشید احمد کو بھی مدعو کیا گیا ہے ،7جون کو سید غوث علی شاہ کی رہائشگاہ پر منعقدہ اجلاس میں سابق صدر جنرل (ر) پرویز مشرف بھی شریک ہوں گے جس میں لیگی دھڑوں کے انضمام کے حوالے سے معاملات زیر بحث آئیں گے ۔ذمہ دار ذرائع کے مطابق سردار ذوالفقار علی خان کھوسہ ،سید غوث علی شاہ اور سردار دوست محمد کھوسہ کی مختلف لیگی رہنماﺅں سے براہ راست ملاقاتوں کا سلسلہ جاری ہے سردار ذوالفقار علی خان کھوسہ اسی تناظر میں ملاقاتیں کرنے کے بعد گزشتہ روز اسلام آباد سے لاہو رپہنچ گئے ہیں جبکہ سید غوث علی شاہ اور سردار دوست محمد کھوسہ اسلام آباد میں مختلف رہنماﺅں سے ملاقاتیں کرنے کے بعد آج جمعہ کے روز لاہور پہنچیں گے ۔ ذرائع کے مطابق کل ہفتہ کو سردار ذوالفقار علی خان کھوسہ کی رہائشگاہ پر غیر رسمی اجلاس منعقد ہوگا جس میں مسلم لیگ (ق) کے مرکزی رہنما چوہدری پرویز الٰہی کی بھی شرکت کا امکان ہے جبکہ عوامی مسلم لیگ کے سربراہ شیخ رشید کو بھی مدعو کیا گیا ہے ۔ ذرائع نے بتایا ہے کہ 7جون کو سید غوث علی شاہ کی رہائشگاہ پر لیگی رہنماﺅں کا اہم اجلاس منعقد ہوگا جس میں سابق صدر جنرل (ر) پرویز مشرف بھی شرکت کریں گے ۔ مذکورہ اجلاس میں لیگی دھڑوں کے انضمام بارے معاملات زیر بحث آئیں گے اور حتمی فیصلہ ہونے کے بعد رہنماﺅں کو ذمہ داریاں سونپنے کا اعلان کیا جائے گا