اسلا م آباد (مانیٹرنگ ڈیسک) سابق وزیراعظم میاں محمد نواز شریف ان کی صاحبزادی مریم نواز اور ان کے داماد کیپٹن (ر) صفدر کو رہائی کے بعد سخت سکیورٹی میں ائیرپورٹ لایا گیا، راستے میں لیگی کارکنوں نے میاں نواز شریف کے حق میں شدید نعرے بازی کی اور پھولوں کی پتیاں نچھاور کیں، سابق وزیراعظم میاں نواز شریف کے استقبال کے لیے آنے والوں کی ایک بڑی تعداد کی وجہ سے اڈیالہ جیل سے ائیرپورٹ پہنچنے تک ایک گھنٹے سے زائد کا وقت لگا، اب خصوصی طیارہ میاں نواز شریف،مریم نواز اور کیپٹن (ر)
صفدر کو لے کر لاہور روانہ ہو چکا ہے، لاہور پہنچنے پر ان کا شاندار استقبال کیا جائے گا جہاں پر لیگی کارکن پہلے سے لاہور ائیرپورٹ پر حج ٹرمینل پہنچ چکے ہیں، وہاں پر بڑی تعداد میں پولیس کے جوان بھی تعینات کر دیے گئے ہیں اس کے علاوہ اینٹی رائٹ فورس کے جوانوں کو بھی حج ٹرمینل پہنچا دیا گیا ہے۔ ایک نجی ٹی وی چینل کی رپورٹ کے مطابق لاہور میں میاں محمد نواز شریف کے پسندیدہ کھانوں کی تیاری شروع کر دی گئی ہے، میاں محمد نواز شریف رات کا کھانا جاتی امراء میں اپنے اہل خانہ کے ساتھ کھائیں گے۔
