اسلام آباد (نیوز ڈیسک): نادرا نے شادی شدہ شہریوں کو خبردار کیا ہے کہ اگر انہوں نے اپنی ازدواجی حیثیت نادرا کے ریکارڈ میں اپ ڈیٹ نہ کی تو آئندہ انہیں مختلف قانونی مسائل کا سامنا کرنا پڑ سکتا ہے۔
تفصیلات کے مطابق نیشنل ڈیٹا بیس اینڈ رجسٹریشن اتھارٹی (نادرا) نے تمام شادی شدہ افراد کے لیے ایک اہم اعلامیہ جاری کرتے ہوئے کہا ہے کہ شہری اپنی Marital Status کو فوری طور پر نادرا کے نظام میں درست کروائیں تاکہ مستقبل میں کسی بھی قسم کی پیچیدگی یا سرکاری ریکارڈ میں تضاد پیدا نہ ہو۔
نادرا کے ترجمان کے مطابق، بہت سے شہریوں نے اپنی شادیوں کا اندراج تو یونین کونسل میں کرایا ہے، مگر نادرا کے ڈیٹا بیس میں وہ معلومات اب تک شامل نہیں کی گئیں۔ ترجمان نے بتایا کہ شہری اپنے قریبی نادرا سینٹر پر جا کر باآسانی ازدواجی حیثیت کی تصحیح کروا سکتے ہیں۔ یہ اقدام نادرا کے اُس منصوبے کا حصہ ہے جس کے تحت قومی ڈیٹا کو جدید اور درست بنانے کا عمل جاری ہے۔
شہریوں کی سہولت کے لیے نادرا نے ایک ایس ایم ایس سروس بھی متعارف کرائی ہے، جس کے ذریعے شادی شدہ افراد کو اپنے ریکارڈ کی تازہ کاری سے متعلق معلومات فراہم کی جائیں گی۔
مزید رہنمائی یا معلومات کے لیے شہری نادرا کی ہیلپ لائن 1777 (موبائل صارفین کے لیے) یا 051-111-786-100 پر رابطہ کر سکتے ہیں، جب کہ نادرا کی آفیشل ویب سائٹ www.nadra.gov.pk بھی ملاحظہ کی جا سکتی ہے۔
نادرا کے مطابق، شناختی کارڈ پر ازدواجی حیثیت میں تبدیلی کے لیے فیس 100 روپے مقرر کی گئی ہے، تاہم اس عمل کے لیے نکاح نامہ یا شادی کا سرٹیفکیٹ فراہم کرنا لازمی قرار دیا گیا ہے۔