سکردو(این این آئی) سیکیورٹی خدشات کے سکردو، لنڈی کوتل اور شمالی وزیرستان میں تعلیمی ادارے مزید دو روز کیلئے بند کردیئے گئے۔
تفصیلات کے مطابق ملک کے مختلف حصوں، بالخصوص سرحدی علاقوں میں امن و امان کی غیر یقینی صورتحال کے باعث تعلیمی سرگرمیاں معطل کر دی گئی ہیں۔ضلعی انتظامیہ نے یہ فیصلے طلبہ اور اساتذہ کی جان و مال کے تحفظ کو یقینی بنانے کیلئے کئے ہیں۔ضلعی انتظامیہ کے مطابق امن عامہ کو لاحق خدشات کے پیشِ نظر سکردو میں تمام تعلیمی ادارے مزید دو روز کیلئے بند رہیں گے۔ضلع خیبر کی انتظامیہ نے پاک-افغان سرحد سے ملحقہ علاقوں میں تمام سرکاری اسکولوں کو غیر معینہ مدت کیلئے بند کرنے کا حکم دیا ہے، تعلیمی سرگرمیوں کی بحالی کا فیصلہ حالات کا جائزہ لینے کے بعد کیا جائے گا۔
سرحد پر جاری حالیہ تنا کے باعث شمالی وزیرستان کے سرحدی دیہات میں بھی سکول بند کر دیے گئے ہیں تاکہ طلبہ اور عملہ کسی بھی ممکنہ ناخوشگوار واقعے سے محفوظ رہ سکے۔دوسری جانب نگران وزیرِ اعلی گلگت بلتستان کی زیرِ صدارت اسپیشل اپیکس کمیٹی کا اجلاس منعقد ہوا جس میں صوبے کی مجموعی سیکیورٹی صورتحال کا تفصیلی جائزہ لیا گیا۔کمیٹی نے دو ٹوک فیصلہ کیا کہ ریاست کی رٹ ہر صورت برقرار رکھی جائے گی اور سرکاری املاک کو نقصان پہنچانے والے شرپسند عناصر کو قانون کے کٹہرے میں لایا جائے گا۔اجلاس میں واضح کیا گیا کہ امن و امان کے قیام اور سرکاری تنصیبات کے تحفظ پر کوئی سمجھوتہ نہیں کیا جائے گا۔
