ممبئی(نیوز ڈیسک) بالی وڈ اداکارہ دپیکا پڈوکون نے کہا ہے کہ وہ رشتوں میں بیوفائی کے حق میں نہیں ہے۔ عورتوں کو بااختیار بنانے کیلئے بنائی جانے والی ایک شارٹ فلم پر گزشتہ ایک ماہ سے جاری زبردست تنقید کے بعد پہلی بار اس بارے لب کشائی کرتے ہوئے اداکارہ نے کہا کہ بیوفائی کی ترویج نہیں کر رہی وہ ذاتی طور پر رشتوں میں بیوفائی کے حق میں نہیں بلکہ وفا پر یقین رکھتی ہے۔
شارٹ فلم میں اس کا کریکٹر اس کی مرضی کے مطابق نہیں بلکہ وہ ایک کردار کو نبھا رہی تھی۔ ڈپیکا نے کہاکہ لوگوں نے اس مختصر فلم کے اصل پیغام کو نظرانداز کرتے ہوئے ایک ثانوی بات کو پکڑ کر اس فلم کے بنانے کا مقصد ہی ضائع کر دیا جس کی وجہ سے اسے بے حد مایوسی ہوئی ہے۔ اداکارہ نے مزید کہاکہ فلم کی متعدد لائنز بالکل حذف کر دی گئی اور اس کے سیکوئنز کو اس طرح جوڑا گیا کہ مزہ کر کرہ ہوگیا اور فلم متنازع ہوگئی۔ دپیکا نے ایک سوال کے جواب میں شادی کو ایک پاک اور مقدس رشتہ قرار دیتے ہوئے کہاکہ اس نے کبھی بیوفائی اور دھوکے کی ترویج نہیں کی، شادی کا رشتہ اعتماد، دیانت داری اور وفا کا مرکب ہوتا ہے اور وہ اس بات پر پورے دل سے یقین رکھتی ہے۔