ممبئی (نیوز ڈیسک) بالی ووڈ کے معروف اداکار امیتابھ بچن سوشل میڈیا پر موجود اپنے پرستاروں پر بگڑ گئے تاہم کچھ ہی وقت کے بعد انہوں نے معافی بھی مانگ لی۔ دراصل ہوا کچھ یوں کہ نیپال میں آنے والے حالیہ زلزلے کے بعد سے امیتابھ بچن اپنے بلاگز اور ٹوئٹس وغیرہ میں مسلسل نیپالی عوام کے دکھ کی جانب توجہ مبذول کروا رہے ہیں اور اپنے چاہنے والوں سے اپیل کررہے ہیں کہ وہ زیادہ سے زیادہ چندہ دیں۔ امیتابھ کے اس اقدام کو ان کے پرستاروں کی جانب سے جھوٹی ہمدردی بٹورنے کی ایک کوشش قرار دیا گیا جس پر امیتابھ کے لئے اپنے غصے کو قابو میں رکھنا ممکن نہ رہا۔ امیتابھ نے انہیں کھری کھری سنانے کے علاوہ یہ بھی کہا کہ کوئی انہیں تمیز سکھائے اور انہیں دوسروں کی مدد کرنے کا درس دے۔
امیتابھ جو کہ عام طور پر اپنے ٹھنڈے مزاج کی وجہ سے جانے جاتے ہیں، کچھ وقت کے بعد ایک اور بیان کے ساتھ سامنے آئے جس میں انہوں نے کہا کہ انہیں احساس ہے کہ ان کے الفاظ سخت تھے تاہم کبھی کبھی یہ ضروری ہوتا ہے کیونکہ ان کے ایک نیک مقصد کوسستی شہرت حاصل کرنے کا طریقہ قرار دیا گیا تھا۔