کراچی(نیوز ڈیسک)پاکستان فلم پروڈیوسر ز ایسوسی ایشن کے چیئر مین و ہدایتکار سید نور نے کہا کہ ملکی فلم انڈسٹری کو استحکام و فروغ دینے کیلئے باصلاحیت رائٹر زاور تخلیقی افراد کی اشد ضرورت ہے ، جدید ٹیکنالوجی کے دور میں مقابلے بازی کا رجحان بڑھ رہا ہے ،ہمیں فارمولا فلموں کی بجائے موضوعاتی ، سبق آموز اوراصلاحی کہانیوں پر فلمیں بنانا ہوں گی۔ ان خیالات کا اظہار انہوں نے گزشتہ روز کراچی آمد پر نمائندہ نجی ٹی وی سے گفتگو کرتے ہوئے کیا۔ سید نور نے کہا کہ میں کراچی کے دو روزہ دورے پر آیا ہوں۔اس دوران کئی اداروں نے فلمسازی کیلئے رابطے کئے ہیں۔ نواب حسن صدیقی بھی اچھوتے موضوع پر کہانی لکھ رہے ہیں۔ جس کی ڈائریکشن دینے کا فیصلہ میں نے کرلیا ہے۔فلم “ جب تک ہے جاں تم میرے ہو ” رومانی ،معاشرتی رویوں و ناانصافی کے موضوع پر ہوگی ، جس میں پہلی بار ایک خاتون جج و سزا ئے موت کے منتظر ملزم کی رومانی کہانی پیش کی جائیگی۔ سید نور نے مزید کہا کہ ہم نے پاکستانی فلموں کو پروموٹ کرنے کیلئے ہمیشہ قربانی دی ہے۔ اس فلم کو معروف فلم تقسیم کار امجد رشید شیخ کے تعاون سے ہی مکمل کیا جائیگا۔ ا س دورے میں ان کے ہمراہ اداکارہ صائمہ بھی آئی ہیں۔ وہ اپنی زیر تکمیل ٹی وی ڈرامہ سیریل” رنگ لگا“کا بقایا کا م مکمل کرواکے واپس جائیں گی۔