کراچی (نیوز ڈیسک )میرا نے پاکستانی فلموں کے لئے پروڈیوسرز کے پاس چکر کاٹنے شروع کردیئے ہیں۔اداکارہ نے گزشتہ ایک ماہ کے دوران کراچی میں ناکام کوششوں کے بعد اب لاہور میں ڈیرے ڈالے ہوئے ہیں۔یواین پی کے مطابق ذرائع نے انکشاف کیا ہے کہ پشتو فلم میں کام کرنے کے باوجود مزید فلموں میں کام نہ ملنے پر اب انہوں نے اردو فلموں میں کا م کے حصول کے لئے مختلف پروڈیوسرز سے رابطے کئے لیکن ان کی جانب سے بھی کوئی یقین دہانی نہ ملنے پر میرا اسدالحق کی پہلی فلم دیکھ مگر پیار سے کے سیٹ پر پہنچ گئیں اور فلم میں کام کر نے کی خواہش کا اظہار کیا جس پرہدایتکار اسد الحق نے ان کو ٹال دیا۔ معلوم ہوا ہے کہ میرافلم میں کام کرنے کیلئے روزانہ ان کے سیٹ پر پہنچ جاتی ہیں جس کی وجہ سے حمائمہ ملک اور دیگر فنکار ان کے آنے سے ڈسٹرب ہونے لگے۔ ایک فنکار نے اپنا نام نہ بتانے کی شرط پر بتایا ہے کہ اداکارہ میرا نے فلم میں بلامعاوضہ کام کرنے کی بھی آفر کی ہے۔ ان کا کہنا ہے کہ اسد الحق کی فلم کا حصہ بننا میرے لئے کسی اعزاز سے کم نہیں ہوگا۔ اس حوالے سے اداکارہ میرا کا موقف جاننے کے لئے رابطہ کرنے کی کوشش کی گئی تاہم ان سے رابطہ نہ ہوسکا۔