وزیر اطلاعات پرویز رشید کہتے ہیں پی ٹی آئی کا دھرنا جعلی تھا اسی لئے ناکام ہوا جوڈیشل کمیشن بن گیا دیکھتے ہیں عمران خان کے تھیلے سے بلی باہر آتی ہے یا نہیں؟۔ یمن پر پارلیمنٹ کی قرار داد فرد واحد کا فیصلہ نہیں پاکستان مسئلے پر ثالث کا کردار ادا کرے گا۔میڈیا سے گفتگو کرتے ہوئے پرویز رشید نے کہا کہ تحریک انصاف نے دھاندلی کے ثبوت دو سال سے پوٹلی میں بند کر رکھے ہیں۔ بڑے بڑے دعوے بھی کئے گئے دیکھتے ہیں اب تھیلے سے بلی باہر آتی ہے یا نہیں۔ وزیر اطلاعات نے کہا کہ کپتان خوف ختم کرنے کراچی گئے تھے لیکن خود خوفزدہ ہو کر لوٹ آئے۔ پرویز رشید نے کہا کہ پاکستان یمن کے مسئلے پر ثالث کا کردار ادا کرے گا۔ پارلیمنٹ کی قرارداد مقدس ہے سعودی عرب کی سلامتی کو خطرہ ہوا تو اپنا فرض ادا کریں گے۔ وزیر اطلاعات نے کہا کہ خارجہ پالیسی بند کمرے میں نہیں بنی پہلی بار عوام کو ملکی فیصلوں کا حق دیا گیا ہے۔