اسلام آباد (نیوز ڈیسک )دنیا بھر میں کچھ انجینئرنگ کمپنیاں روبوٹس کے ایسے ڈیزائن تخلیق کر رہی ہیں کہ عقل دنگ رہ جاتی ہے جبکہ ان کی کارکردگی بھی حیران کن ہے۔ ان میں اڑنے والے روبوٹ بھی ہیں اور ایسے روبوٹ بھی ہیں جو انسانوں سے بہتر تیر، بھاگ اور پھلانگ سکتے ہیں۔”ڈسکوری نیوز“ میں رینی موریڈ نے کچھ ایسے ہی روبوٹس کا تعارف کرایا ہے۔ بوسٹن ڈائنامک نامی معروف کمپنی نے چار پایہ روبوٹ بنایا ہے جو کتے کی شکل کا ہے جو بھاگنے میں بے مثال ہے اور سیڑھیاں بھی چڑھ سکتا ہے۔اس روبوٹ کی تیاری میں الیکڑیکل اور ہائیڈرالک سسٹم کا استعمال کیا گیا ہے اور یہ ان ڈور اور آٹ ڈور دونوں جگہوں پر موزوں کارکردگی کا حامل ہے۔کینگرو کی شکل کا ایک روبوٹ فیسٹو نامی آٹومیشن کمپنی نے بنایا ہے جو خصوصی طور پر کینگروکی حرکات و سکنات کو مدنظر رکھ کر تیار کیا گیا ہے۔ کینگرو ہی کی طرح یہ روبوٹ اس وقت اپنی توانائی بحال کر لیتا ہے جب یہ اچھلتا ہے اور اسے اگلی چھلانگ کیلئے اپنے سسٹم میں محفوظ کر لیتا ہے۔بیچ بوٹ نامی روبوٹ کچھوے سے مماثل ہے اور اسے ڈزنی ریسرچ لیب نے بنایا ہے جو ریت پر رینگ سکتا ہے۔ چھوٹے موٹے جانوروں کو تو چھوڑیئے یہاں تو ہاتھی کی نقل بھی آ گئی ہے، ظاہر ہے ہاتھی کی شکل کا روبوٹ ہے تو اس کا وزن بھی زیادہ ہی ہو گا، جی ہاں! یہ 45ٹن لکڑی اور سٹیل سے بنا ہے، یہ مکینیکل ہاتھی49 افراد کو اٹھا کر 45 منٹ کی واک کر سکتا ہے۔اٹریاس روبوٹ پرندوں کی نقالی کرتے ہوئے بنائے گئے ہیں اور یہ ممکنہ طور پر دو ٹانگوں پر دوڑنے والے دنیا کے تیز ترین اور پھرتیلے روبوٹ ہیں، اس روبوٹ کو اوریگون سٹیٹ یونیورسٹی کی ڈائنامک روبوٹک لیبارٹری میں تیار کیا گیا ہے۔سانپ کی کسر باقی تھی تو جاپان کی ہائی بوٹ نامی کمپنی نے اے سی ایم -آر فائیو ایچ نامی سانپ جیسا روبوٹ بنا لیا ہے، اسے پانی کے اندر تحقیقی کاموں کیلئے استعمال کیا جائے گا اور اس مقصد کیلئے اس کے اگلے حصے میں وائرلیس کیمرہ نصب کیا گیا ہے جو زیرآب تصاویر لینے میں کام آئے گا۔ کینگرو بھی جرمن کمپنی فیسٹو نے بنایا تھا، اب روبوٹک چیونٹیاں بھی اسی کمپنی کا کارنامہ ہیں، بائیونک آنٹ نامی روبوٹ اس کمپنی کا تازہ ترین شاہکار ہے، روبوٹک چیونٹیوں کو بڑی تعداد میں اس طرح ڈیزائن کیا گیا ہے کہ یہ اسی طرح کے مشترکہ مقصد کیلئے کام کر سکیں جس طرح اصل چیونٹیاں کرتی ہیں۔امریکی بحریہ نے گھوسٹ سوئمر کے نام سے ایک روبوٹک شارک بنائی ہے جو پانچ فٹ لمبی اور سو پا?نڈ وزنی ہے۔اسے بائیومیٹک ڈیزائن کے اصولوں کے تحت بنایا گیا ہے اور اس کو معلومات رسانی، نگرانی اور جاسوسی کے مقاصد کیلئے استعمال کیا جا سکتا ہے۔چیتا نامی چار پایہ روبوٹ بوسٹن ڈائنامکس نے بنایا ہے اور یہ 28.3میل فی گھنٹہ کی رفتار سے دوڑ سکتا ہے۔ روبگ ٹکس نامی کمپنی نے ٹی ایٹ کے نام سے حیرت انگیز روبوٹ بنایا ہے، یہ بڑی مکڑی کی طرح ہے اور اس کی آٹھ ٹانگیں ہیں، اس میں جدید ترین کیمرے لگے ہیں اور 26 موٹریں ہیں، ہر ٹانگ میں تین ، تین موٹریں اور پیٹ میں دو موٹریں نصب ہیں۔