لاہور(این این آئی)قومی ٹیم کے چیف سلیکٹر انضمام الحق نے کہاکہ سینٹرل کنٹریکٹ کیلئے کھلاڑیوں کے ناموں کااعلان کرنے سے پہلے کپتان سرفراز احمد اورہیڈ کوچ مکی آرتھر سے رائے لی گئی تھی جس کے بعد ہی35ناموں کااعلان کیا گیا ہے۔ انہوں نے کہا کہ سینٹرل کنٹریکٹ میں کسی کھلاڑی کے ساتھ ناانصافی نہیں کی گئی۔  جو کھلاڑی جگہ نہیں بناسکے انہیں چاہئے کہ وہ محنت کریں اور کنٹریکٹ لسٹ میں جگہ بنائیں۔

انضمام الحق کاکہنا تھا کہ سلیکٹرز ٹیم کے کھلاڑیوں کے علاوہ نوجوان کرکٹرز اور ڈومیسٹک کے ٹاپ پرفارمرز کو اہمیت دے رہے ہیں۔ فواد عالم، سہیل تنویر اورانورعلی سمیت کوئی بھی کھلاڑی کارکردگی دکھا کر پاکستان ٹیم میں جگہ بناسکتا ہے۔ فواد عالم کے بارے میں سلیکشن کمیٹی پرتنقید کرنے والے یہ نہیں سوچ رہے کہ مجھ سے پہلے بھی فوادعالم کسی ٹیم میں شامل نہیں تھے۔ انہیں آخری بار2009ء میں ٹیسٹ میچ کیلئے منتخب کیا گیا تھا۔