اسلام آباد(مانیٹرنگ ڈیسک)پی ایس ایل فائنل کے ٹکٹوں کی خریداری کیلئے کرکٹ دیوانے انتظار کی سولی پر لٹک گئے، فائنل لاہور میں ہو گا یا نہیں تاحال کوئی فیصلہ نہ ہو سکا ۔ تفصیلات کے مطابق پاکستان کے سب سے بڑا میگا ایونٹ پاکستان سپر لیگ کے لاہور میں فائنل بارے تاحال فیصلہ نہ آنے کی وجہ سے کرکٹ کے دیوانے ٹکٹوں کی خریداری

کے انتظار میں سولی پہ لٹکے نظر آتے ہیں جبکہ چیئرمین پی ایس ایل 25فروری کو لاہور میں ٹکٹوں کی فراہمی کی یقین دہانی کروا چکے ہیں ۔ ذرائع کے مطابق ٹکٹوں کی فراہمی میں التوا اس وجہ سے ہے کہ کرکٹ بورڈ پنجاب حکومت کے گرین سگنل کے انتظار میں ہے اور پنجاب حکومت کو سکیورٹی اداروں کی رپورٹ کا انتظار جس کے بعد پی ایس ایل کے لاہور میں فائنل کے انعقاد کا فیصلہ کرتے ہوئے ٹکٹوں کی فراہمی کا سلسلہ شروع کیا جائے گا۔واضح رہے کہ پی ایس ایل میگا ایونٹ کا فائنل 5مارچ کو شیڈول ہے مگر تاحال اس کے لاہور میں انعقاد بارے اگر مگر کی صورتحال برقرار ہے۔