پنجگور (این این آئی ) دبئی کے شہزادوں پر مشتمل شکاری قافلہ سی ون 30طیارے کے زریعے پنجگورپہنچ گیا ائیرپورٹ پر ممتاز سماجی شخصیت حاجی عطاء اللہ بلوچ اور دیگر نے استقبال کیا دبئی کے شیوخ پنجگور میں نایاب پرندہ تلور کا شکار کریں گے ۔تفصیلات کے مطابق دبئی کے شہزادوں پر مشتمل 37رکنی قافلہ شیخ النہیاں سیف محمد اور شیخ محمد خلیفہ کی سربراہی میں سی ون 30طیارے کے زریعے پنجگور پہنچ گیا ۔ایئر پورٹ پرپنجگور کے ممتاز سماجی شخصیت حاجی عطاء اللہ اور دیگر نے شیوخ کا استقبال کیا بعد ازان شہزادوں کا قافلہ ذاتی رہائش گاہ واقع پیرے جہلگ روانہ ہوگئے عرب شیوخ پنجگور میں قیام کے دوران نایاب پرندہ تلور کا شکار کریں گے ۔
مسلم لیگ ن پنجگور کے ترجمان نے عرب شیوخ کی پنجگور میں شکاری سرگرمیوں پر تشویش کا اظہار کرتے ہوئے کہا ہے کہ عدالت کی جانب سے پابندی لگانے کے باوجود شکار کھیلنا عدالتی احکامات کی سنگین خلاف ورزی ہیں انہوں نے کہا کہ عرب شیوخ پنجگور میں کوئی بھی فلاحی ادارہ قائم نہیں کرسکے جس سے علاقے کے لوگ اجتماعی فائدہ اٹھا سکیں البتہ چند افراد کو لاکھوں روپے سے نوازا جارہا ہے جو پنجگور کے عوام سے زیادتی ہے انہوں نے کہا کہ عرب شیوخ پنجگور میں یتیوں کیلئے فنڈز دینے کے ساتھ ساتھ تعلیم صحت اور روڑ سیکٹر پر بھی توجہ دیں اور ساتھ ہی مفاد پرست عناصر سے چھٹکارہ حاصل کریں جو مختلف طریقوں سے لوگوں کے نام پر لوٹ مار میں مصروف ہیں ترجمان نے کہا کہ پنجگور کے عوام نایاب پرندے کے تحفظ کیلئے اور نسل کو بچانے کیلئے اقدامات کیا جائے ۔
