کراچی(این این آئی)کراچی میں ایک جانب ٹارگٹ کلنگ میں تیزی آئی ہے تو دوسری طرف قانون نافذکرنے والے اداروں نے بڑی گرفتاریاں کرنابھی شروع کردی ہیں۔ تین روز میں فیصل رضا عابدی،اہل سنت والجماعت کراچی کے جنرل سیکرٹری علامہ تاج محمدحنفی اور مولانامرزا یوسف حسین کو گرفتار کر لیا گیاہے۔تفصیلات کے مطابق شہرقائد میں اچانک ایک بار پھر قتل و غارت گری کا سلسلہ شروع ہوا تو قانون نافذ کرنے والے اداروں میں بھی تشویش کی لہر دوڑ گئی۔ دھڑادھڑ گرفتاریاں شروع ہو گئیں۔ تازہ ترین کارروائی کراچی کے علاقے ناگن چورنگی میں کی گئی۔رینجرز ذرائع کے مطابق سرچ آپریشن کے دوران مسجد اکبر اور ملحقہ ہاسٹل کی تلاشی لی گئی۔ کارروائی کے دوران اہلسنت والجماعت کے مرکزی رہنما علامہ تاج محمدحنفی کو گرفتار کر لیا گیا۔ ذرائع کا کہنا ہے کہ اہلسنت والجماعت کے ایک اور رہنما رب نواز حنفی کی گرفتاری کے لیے بھی چھاپے مارے جارہے ہیں۔اس سے قبل ناظم آباد سے جامع مسجد نور ایمان کے پیش امام مولانا مرزا یوسف حسین کو بھی حراست لیا گیا ہے جبکہ جمعہ کو رات گئے پیپلزپارٹی کے سابق سینیٹر فیصل رضا عابدی کو بھی گرفتار کرلیا گیا۔ دوسری جانب رینجرز نے رضویہ سوسائٹی میں بھی سرچ آپریشن کرکے تین افراد کو حراست میں لے لیا۔ذرائع نے بتایا کہ حراست میں لیے جانے والے افراد کی شناخت باقر، اکبر اور اعظم عرف اجو کے ناموں سے ہوئی ہے جن کے قبضے سے اسلحہ بھی برآمد کیا گیا ہے۔ تمام زیرحراست افراد کو تفتیش کے لیے نامعلوم مقام پر منتقل کر دیا گیا۔