اسلام آباد(مانیٹرنگ ڈیسک)بھارتی فلم انڈسٹری کے کنگ خان نے کہا ہے کہ مجھے یہ بار بار بتانے کی ضرورت کیوں پیش آتی ہے کہ میں دیش بھگت ہوں ، جبکہ میں بار بار کہہ چکا ہوں کہ میں اپنے ملک سے پیار کرتا ہوں اور ایسا کرنے کی وجہ بھی ہے کہ اس ملک نے مجھے سب کچھ دیا۔مجھ پر یہ الزام کہ میں رہتا بھارت میں ہوں اور باتیں پاکستان کی کرتا ہوں دیکھ کر مجھے رونا آتا ہے ۔
تفصیلات کے مطابق بھارتی فلم انڈسٹری کے سپر سٹارشاہ رخ خان نے ایک نجی ٹی وی چینل کے پروگرام میں اپنے محب وطن ہونے کے متعلق سوال اٹھائے جانے پر برہمی کا اظہار کرتے ہوئے کہا کہ مجھے یہ بتانے کی ضرورت کیوں پیش آتی ہے کہ میں اپنے وطن سے پیار کرتا ہوں اور ایسا ہر بھارتی کو کرنا چاہئے اور ایسا کرنے کے لئے کسی کو بتانے کی یا کسے کے کہنے کی ضرورت نہیں ہے کیونکہ بھارت نے ہمیں سب کچھ دیا ہے ۔بھارتی اداکار نے مزید کہا کہ جب مجھ پر یہ الزام لگایا جاتا ہے کہ میں اینٹی نیشنلسٹ ہوں تو مجھے بہت دکھ ہوتا ہے اور میں بہت دکھ کے ساتھ یہ بات کہنا چاہتا ہوں کہ آخر مجھے ہی کیوں بار بار یہ سب باتیں دہرانا پڑتی ہیں۔ ان کا کہنا تھا کہ نوجوانوں سے میری اپیل ہے کہ ان چھوٹی چھوٹی باتوں کو چھوڑ کر ملک کی ترقی کے لئے اپنا مثبت کردار ادا کریں۔
