نئی دہلی (آئی این پی )بھارتی وزیر داخلہ راجناتھ سنگھ نے اسلام آبادمیں ہونے والی سارک وزراء داخلہ کانفرنس میں شرکت کے بعد وطن واپس پہنچتے ہی وزیراعظم نریندر مودی سے ملاقات کی اور انھیں اپنے دورہ پاکستان کے حوالے سے آگاہ کیا ۔جمعرات کو بھارتی میڈیاکے مطابق وزیرداخلہ راجناتھ سنگھ نے اسلام آبادمیں ہونے والی ساتویں سارک وزراء داخلہ کانفرنس میں شرکت کے بعد وطن واپس پہنچنے کے فوری بعد وزیراعظم نریندرمودی سے ملاقات کی ۔ذرائع کا کہنا ہے کہ راجناتھ سنگھ وطن واپس پہنچتے ہی ائیرپورٹ سے سیدھے نریندرمودی سے ملاقات کرنے کیلئے روانہ ہوئے اور ان سے مل کر اپنے دورہ پاکستان کے حوالے سے آگاہ کیا۔وزیر داخلہ راجناتھ سنگھ نے وزیراعظم مودی کو سارک وزراء داخلہ کانفرنس میں اپنی تقریر اور سیشن کے دوران پاکستانی حکام اور کانفرنس کے شرکاء سے ملاقاتوں کے بارے میں آگاہ کیا۔بھارتی میڈیا کے مطابق وزیر داخلہ راجناتھ سنگھ اسلام آباد سے بارڈر سیکورٹی فورس کے طیارے کے ذریعے شام ساڑھے چار بجے نئی دہلی پہنچنے اور وزیراعظم نریندرمودی سے ملاقات کی خاطر ائیرپورٹ پر شیڈول اپنی پریس بریفنگ منسوخ کردی۔یادر رہے کہ بھارتی وزیر داخلہ راج ناتھ سنگھ وفاقی دارالحکومت میں جاری ساتویں سارک وزرائے داخلہ کانفرنس ادھوری چھوڑ کر وطن واپس چلے گئے تھے ۔ جب کہ وفاقی وزیرداخلہ چوہدری نثار علی خان کی دھواں دھار تقریر اور مقبوضہ کشمیر میں بھارتی فوج کے مظالم پر دو ٹوک موقف پر بھی بھارتی وزیر داخلہ راج ناتھ سنگھ اکھڑے اکھڑے دکھائی دیئے اور کانفرنس کے اختتام سے قبل ہی وہ نئی دہلی کے لئے روانہ ہوگئے۔ کانفرنس کے دوران وفاقی وزیرداخلہ چوہدری نثار کا راج ناتھ سنگھ کی موجودگی میں مقبوضہ کشمیر پر دو ٹوک موقف اختیار کرتے ہوئے کہنا تھا کہ آزادی کی جد وجہد اور دہشت گردی میں فرق ہے اور دہشت گردی کا ہر واقعہ قابل مذمت ہے لیکن مقبوضہ کشمیر کے معصوم بچوں اور شہریوں پر وحشیانہ تشدد دہشت گردی کے زمرے میں آتا ہے۔