لاہور: (ویب ڈیسک) پاکستانی پہلوان بادشاہ خان نے بھارتی ریسلر کالی کو مقابلے کا چیلنج دیدیا۔ ایک نجی ویب سائٹ کو انٹرویو دیتے ہوئے بادشاہ خان کا کہنا تھا کہ وہ بھارتی ریسلر کالی سے مقابلہ کرکے نئی تاریخ رقم کرنا چاہتا ہے۔ انہوں نے اپنے انٹرویو میں دعویٰ کیا کہ اگر یہ میچ ہوا تو 2 ارب سے زائد لوگ اس میچ سے لطف اندوز ہوں گے۔ بادشاہ خان کا کہنا تھا کہ وہ بچپن سے ہی ریسلنگ کے شوقین تھے اس لیے انہوں نے 11 سال کی عمر میں طے کر لیا تھا کہ وہ پہلے پاکستانی ریسلر بنیں گے۔ بادشاہ نے اس عزم کا اظہار کیا کہ وہ جلد ڈبلیو ڈبلیو ای اور نیو جاپان پرو ریسلنگ رنگ میں پاکستانی پرچم لہرا کو ملک کا نام روشن کریں گے۔