لاہور(این این آئی)پنجاب ڈیزاسٹر مینجمنٹ اتھارٹی (پی ڈی ایم اے )پنجاب نے صوبہ بھر میں آندھی، بارشوں اور ژالہ باری کے حوالے سے موسمی الرٹ جاری کر دیا ۔
پی ڈی ایم اے کے ترجمان کے مطابق یکم سے 6 جولائی تک لاہور سمیت پنجاب کے بیشتر اضلاع میں بارشوں کا امکان ہے جبکہ بعض علاقوں میں تیز آندھی اور ژالہ باری بھی ہو سکتی ہے۔ڈائریکٹر جنرل پی ڈی ایم اے عمر جاوید نے وزیراعلی پنجاب کی ہدایات کے پیش نظر تمام کمشنرز اور ڈپٹی کمشنرز کو الرٹ رہنے کی ہدایات جاری کر دی ہیں، جس میں کہا گیا ہے کہ آسمانی بجلی کی گرج چمک کے دوران محفوظ مقامات پر رہیں اور کھلے مقامات یا کھلی فضاء میں ہرگز موجود نہ ہوں۔ڈی جی پی ڈی ایم اے نے کسانوں کو بھی ہدایت کی ہے کہ وہ موسمی صورتحال کو مدنظر رکھتے ہوئے اپنی فصلوں اور دیگر زرعی سرگرمیوں کے لیے پیشگی حفاظتی اقدامات کریں۔
